Hanekeren “Amour” nagusi Cannesen

Michael Hanekek Canneseko Zinemaldiaren Urrezko Palma bereganatu du bigarren aldiz zahartzaroa eta eutanasia jorratzen dituen Amour izeneko filmaren eskutik.

2009. urtean ere sari nagusia jaso zuen Das weisse Band (Zinta zuria) film bikainari esker. Horrela seigarren zuzendaria dugu urrezko palma birritan lortu duena. Gainerako irabazleok Francis Ford Coppola, Shoei Imamura, Bille August, Emir Kusturica eta Dardenne anaiak ditugu.

Zuzendari austriarraren azken film honetan, Emmanuelle Rivak (Hiroshima mon amour) eta Jean-Louis Trintignant-ek -18 urteren buruan pantailara itzuli dena- kulturaren eta bizitzaren guztiz zale diren laurogei urteko bikote bat antzezten dute. Bi protagonistak musikari oso lotuta bizi dira. Gizona zuzendari ospetsua izandakoa da eta emakumea musikaria da. Halere, goiz batean emakumeak istripua izan eta erdi paralizatuta geratzen da. Senarrak maitasunez aurre egiten die halabeharrezko aldaketei, baina amaieran heriotza irtenbide gisa ikusten du.

Porzierto, aspaldiko partez aktore euskalduna dugu kultuko film baten aktoreen artean. Izan ere, Ramon Agirre, arestian Harriya euskal filman ikusi duguna, atezainaren rola betetzen du saritutako filmean. Aktore donostiarrak aitortu duenez, pasaje txikia da berea baina nolabaiteko garrantzia duena oso personaje gutxi dituen film honetan.

Bestetik, Carlos Reygadas-ek zuzendari onenaren saria jaso zuen Post Tenebras Lux filmean egindako lanagatik. Aurretik ere, zinegile mexikarrak Epaimahaiaren saria konpartitu zuen 2007. urtean  Luz silenciosa (Argi ixila) filmarekin Marjane Satrapi eta Vincent Paronnaudek zuzendutako Persepolis animazio-filmarekin.

Hona hemen palmares osoa:

• URREZKO PALMA
  Amour, Michael Haneke (Frantzia-Alemania-Austria)
• SARI NAGUSIA
  Reality, Matteo Garrone (Italia)
• ZUZENDARI ONENAREN SARIA
  Carlos Reygadas, Post Tenebras Lux (Mexiko)
• GIDOI ONENAREN SARIA
  Christian Mungiu, Beyond the Hills (Dupa dealuri, Errumania)
• URREZKO GANBERA
  Beasts of the Southern Wild, Benh Zeitlin (Estatu Batuak)
• EPAIMAHAIAREN SARIA
  The Angels Share, Ken Loach (Erresuma Batua)
• AKTORESA ONENAREN SARIA
  Cosmina Stratan eta Cristina Flutur, Beyond the Hills
• AKTORE ONENAREN SARIA
  Mads Mikkelsen, The Hunt (Jagten, Danimarka)
• URREZKO PALMA FILM LABUR ONENARI
  Silent, L. Rezan Yesilbas (Sessiz-be deng, Turkia)

Gaiarekin lotuta: (gazteleraz) http://academyawards2009.blogspot.com.es/2011/04/entrevista-ramon-agirre-miembro-del.html