MENDI zinemaldiaren V. edizioko onena Gasteizen

Bilboko egoitza berria estreinatu ondoren, Mendi Film Festival zinemaldia lehenengo lau edizioetan lagun izan zuen Gasteiza itzultzen da MENDI Tour-ean. Horrela, asteazkenetik ostirala bitartean, aukera izango da Euskadiko hiriburuan ere MENDIko V. edizioko film onenak ikusteko.

Honatz MENDI Tour-ak Gasteizen eskainiko duen programa:

Urtarrilak 23, asteazkena

Erhard Loretan, film irabazlearen protagonista, Gasteizen egon zen Mendiko III. edizioan

«Erhard Loretan: respirer l’odeur du ciel»  (Benoît Aymon. Suitza. 2011, 52´).

Film onenari sari nagusia

52 urte bete zituen egunean, Erhard Loretan istripu batean hil zen, Alpeetan gidari lanetan ari zela. Erhard, munduko hamalau zortzimilakoak eskalatu zituen hirugarren gizona, “Lord”-en ezpalekoa zen, alpinismoaren orrialderik ederrenak idatzi dituzten alpinisten kasta horretakoa. Dokumentu eta lekukoen testigantza argitaragabeekin, “Binoculars”-ek omenaldi zinez hunkigarria egiten dio gizon eta mendizale bikain honi. Gizona bere handitasun eta hauskortasun osoan azaltzen du ikus-entzunezkoak.

Epaimahaiak honako film bikain hau saritzeko arrazoiak eman nahi izan zituen epaiarekin batera:  "Epaimahaiak egilearen maisutasuna azpimarratu nahi du, haren begirada zorrotzarekin eta testigantzen indar gehituarekin, alpinista nahiz gizaki gisa parekorik ez duen norbaiten erretratu intimo eta gizatiarra sortzen bait du. Gidari jakintsu eta eredugarri bati eginiko merezitako omenaldia, bere barrenari begiratzeko gaitasuna eta ausardia izan zuena, eta munduko gailurrik nagusienei bezala bereziki patuak gorde zizkion bere barneko mendi malkartsuei aurre egin ziena."

«Of Souls + Water: The Nomad» Skip Armstrong (7’)

Film labur onena

Zergatik dabil batetik bestera, alderrai? Zeren bila? Oinez, eskiz eta kayakean harat-honat bidaian dabil Erik, munduan eta bizitzan barna joan-etorrian, jende gehienak bidaiatu ohi duen moduaren aldean guztiz bestela. Bera da nomada. Erik Boomer da The Nomad filmeko protagonista, National Geographicek urteko abenturazale izendatutako esploratzailea. Artikoko ipar muturra, Kalifornia Behekoko itsasoak eta basamortuak, DCko kaleak eta ipar-mendebaldeko ur-jauziak esploratzen eginiko bidaiak laburtzen dira filmean.

 «Aventura sin taladro» 60’: Unai Mendiak aurkeztutako ikusentzunezkoa

 “Nire inguruan ikusten dudanaren arabera, pentsatzen dut agian ni naizela erratuta dagoena. Gauzak ia inork ulertzen ez dituen bezala ulertzen dituena, han urrunean gelditu zena, oso atzean, zaharkitua. Arroka, ahal baldin bada aurkitu genuen bezala, erabat garbi uztea polita dela pentsatzen jarraitzen dut".

Urtarrilak 24, osteguna

«Autana» Alastair Lee (55)’

Leo Houlding eskalatzaile abenturazalea eta Alastair Lee zinemagilea eskutik datoz berriro ere neurri epikoak dituen ekoizpen handi honekin. Oraingoan, Leo (Erresuma Batua) eta bere eskaladako lagunak, Sean Leary (AEB) eta Jason Pickles (Salford, Erresuma Batua), Amazoniaren bihotzera menturatuko dira, oihaneko tepui galdu batean, Autana mendiaren ekialdeko aurpegi ikusgarrian, lehen bidea eskalatzeko asmoarekin. Parekorik ez duen abentura kontatzen du filmak. Eta abenturazko filmen ekoizpenean beste urrats bat ematen du muga ezezagunetarantz, emaitza bikainak lortzeko. Originala, esperimentala, entretenigarria eta bisualki ikusgarria.

«Silbergeier» Vald Celier (19’)

Epaimahaiaren saria

Mendi baten magalean bizi zen neskatila baten historia da hau, noizbait mendiaren gailurrera igoko zela promes egin zuen neska baten historia. Silbergeier, Suitzako Alpeetako bide handi eta teknikoenetako bat izan arren, erakargarriegia suertatu da beti begi-ninietan izan duen neska gaztearentzat.

Zortzi urte behar izan ditu Nina Caprezek, zortzi urte bete pasio, esperientzia eta praktika , prest dagoela sentitu arte. Cédric Lachat bidelagun duela, suitzarra bere sustraietara itzuli da, aspaldiko ametsa betetzeko.

Filmak poesiaz eta umorez kontatzen du epopeia handi hau, mitoa jaiotzen den unetik azkeneko lekukoa jasotzeko unera arte...

Vlad Cellierek zuzendutako ekoizpen frantziar honek Epaimahaiaren saria irabazi zuen: "Orijinaltasuna, freskotasuna eta umorea uztartzeko erakutsitako gaitasuna, horixe azpimarratu nahi izan du Epaimahaiak lan honekin. Eskaladaren gazi-gozoak era soltean erakusten asmatu duela azpimarratu dute. Hori guztia kontatzeko modu arin eta entretenigarria erabiliz, eta gainera, genero rol zaharkituak gaindituz."

David Palmada eta Josep Maria Esquirol irripartsu Baffin irlan

«Sensacions» ikusentzunezkoa (60’), David Palmadak “Pelut” eta Josep Maria Esquirolek “Tato” aurkeztuta.

“Sensacions” Pelut-ek zabalduriko bidearen izena da. "Baffin uhartean, Zirkulu Polar Artikoan, egon ginen 40 egunetatik soilik bi egun eguzkitsu izan genituen behe kanpalekuan eta beste bi paretan. Gainontzean haizea, elurra eta zero azpitik 40 gradurainoko tenperatura...zabor hutsa. Ez nintzateke sekula itzuliko, oso gaixorik egon beharra dago bertara itzultzeko." Bidea amaitu ostean itzulera arriskutsua zeukaten. Bost zamaketa egun 300 kilo arrastaka eramanez eta tentsioz beteriko itxaronaldi luzea, hartz polarrak agertuko zirenaren beldurrez.

Urtarrilak 25, ostirala

«Unicorn Shasimi» (Ben Knight + Travis Rummel + Nick Waggoner. USA 2012, 65’30”)

Argazki onena

"Neguan, haize-bolada hotz etengabeek gogor astintzen dute Siberia eta hezetasuna jasotzen dute Japoniako Itsasoan. Aire heze eta izoztu horrek Hokkaidoko mendien kontra talka egiten duenean, sekulako elurteak jausten dira Japonian iparraldeen dagoen uhartean. Eta orduan, leku hura esploraziorako paradisu harrigarria bihurtzen da eskiatzaile eta snowboarder ausartenentzat. Bazter eta kantoi bakoitzean, urki zilarkaren baso elurtu eder haietan, uste genuen, ziur ginen, unikornioak bidelagun genituela."

«Origins: Obe and Ashima» (Josh Lowell . USA 2011. 22’)

Mendiko kirolen film onena

New Yorkeko bederatzi urteko neskatila bat sekulako zalaparta sortzen ari da boulderraren munduan. Ashima Shiraishi da bere izena. Obe Carrion entrenatzaile grinatsua gidari duela, maistra txikitxo hau lehiaketa guztiak menderatzen ari da eta eskaladaren gaztetasunari loturiko muga guztiak gainditzen. Obek boulderreko proba-eremu handienetakora eramango du Ashima, Hueco Tanks-era, TX. Obek berak han eman zuen jauzia duela 13 urte, boulderraren jatorrietan, eta Ashimak, harri eta zur utziko ditu denak.

«Honnold 3.0» Josh Lowell, Peter Mortimer, Nick Rosen, Alex Lowther (USA: 2012; 33’)

Alex Honnoldek bere belaunaldiko bakarlari ausartenaren ospea bereganatu du. Joko arriskutsu horretan, nola lortzen du anbizio hutsaren eta bizirauteko senaren arteko oreka? Highball boulderreko lehen igoerak, 5.13 edo 8a zailtasunetik gorako bakarkako igoerak era askean, eskalada tradizionaleko urruneko abenturak, abiadura errekorrak The Nose bidean… Honnold oreka horrekiko erronkan ibili da beti, egundaino osatu duen abentura handienerako prestatzen: Yosemite Hirukoitza. Jarduera horretan, 19 orduz azpitik eskalatu ditu Mt. Watkins, Capitan eta Half Dome hormak, eta eskaladaren %95 era askean eta bakarka.

«Elogio del fracaso» 60’  Alberto Iñurrategik aurkeztuta:

“Porrota? Humanizatu egiten gaitu. Gure ezina zerk sotu duen ikasten badugu, ez dago porrotik”. Himalayan, 20 urtetik gorako ibilbidean, Alberto Iñurrategik bidea izan du helburutzat, gailurra osagarri.”

Saio guztiak Vital Kutxaren Fundazio aretoan izango dira (Dendaraba) 19:30etan eta saioko prezioa 3€.koa izango da.