Klaketa
25Feb/160

MENDI TOUR VITORIA-GASTEIZ

Mendia eta abenturari buruzko zine onena Gasteizera etorriko da otsailaren hondarretan Mendi Tourren eskutik. Izan ere, 4 egunetan zehar Mendi Film Festival nazioarteko zinemaldiko pelikula onenen bilduma ikusteko aukera izango dugu.

Mendi tour Mendi Film Festival-eko ekimena da eta mendia eta abenturari buruzko nazioarteko zinema jaialdia 2015eko abenduan egin zen azken edizioko film onenak herriz herri eramateko asmo ditu.

Mendi Film Festival urteroko hitzordua izan ohi da, eta mendiko zinemagintzako ekoizpenik onenak biltzen ditu bere zentzu zabalenean: eskalada eta alpinismoaz batera, muturreko kirolak, eskia, natura, ingurumena, etnografia... hartzen ditu aintzat.

Non: Vital Fundazioaren Aretoa, La Paz kalea, 5 - 1. solairua
Noiz: Otsailak 29, martxoak 2, 3 eta 4. Eguneko 2 saio, 18:00 eta 20:00
Sarrera salmenta: Estadioko Harrera gunean eta Vital Fundazioaren egoitzan (Kordoi Etxea, Hedegile kalea, 24).

CARTEL-MENDI-TOUR-VITORIA-2016

6Mar/150

Mendi zinemaldiaren azken edizioko film onenak Igorren ikusgai

Mendi-amesgarriak-Igorre-burua

  • MENDI AMESGARRIAK IGORRE egitasmoak, MENDITOURRAK Igorren egingo duen geldialdiak, bost pelikula programatu ditu bi jardunalditan, martxoaren 6an eta 13an, herriko Kultur Etxeko Lasarte Aretoan, 19:30etan.

  • Lehenengo jardunaldian, martxoaren 6an, IGORRE MENDITOURRAK  Afterglow eta Valley Uprising pelikulak eskainiko ditu, eta bigarren jardunaldian, martxoaren 13an, Mission Antarctic, 2T on Paiju Peak eta Drawn izango dira ikusgai.

Valley Uprising filmak pelikula onenaren Sari Nagusia eta Ikusleen Saria irabazi zituen Bilbon, MENDI FILM FESTIVALEKO azken edizioan, eta film erakargarrienetakoa izango da IGORREKO MENDITOURREAN, lehen jardunaldian, martxoaren 6an, ostiralean.

valley uprising_001

Valley Uprising filma,  Nick Rosenek eta Peter Mortimerrek 2014. urtean zuzendutako film estatubatuarra da. 98 minutuko film honek Yosemiteko haranean egindako eskaladaren historia kontatzen du narrazio trebe baten bitartez, sekuentziak artxiboko irudiak eta eskalatzaile handien elkarrizketak tartekatuta. Alde serioago bat ere sartzen du, Estatu Batuetako kontrakulturaren historiako pasarte garrantzitsuenak eta garai hartako arazo politiko eta sozialak aipatzen dituelako. Hala ere, aldi berean, dibertigarria eta erabat entretenigarria da hasieratik bukaerara arte. Metraje luzeko film hau ikusle guztiei zuzentzen zaie, eskalatzaileei eta eskaladan adituak ez direnei ere.

Lehen jardunaldian Valley Uprising filmarekin batera, Afterglow ere proiektatuko da Igorren. Edertasuna, misterioa eta eski akrobatikoan munduan dauden lau izar garrantzitsuenak dira metraje laburreko film honen osagaiak.  Afterglow lanak horien nahasketa indartsua eskaintzen digu Columbia Britainiarrean eta Alaskan gauez grabatutako irudietan. Octocopter dronek, azken belaunaldiko kamerek eta LED argiak jantzita daramatzaten eskiatzaileek ilunabarreko distira orain arte ikusi ez dugun moduan erakusten dute. Afterglow, Nick Waggonerrek zuzendutako 2014ko 12 minutuko ekoizpen estatubatuarra dugu.

AFTERGLOW - Lightsuit Segment from Sweetgrass Productions on Vimeo.

Valley Uprising, jatorrizko bertsioan proiektatuko da ingelesez, gaztelaniazko azpitituluez lagunduta. Afterglow ere ingelez proiektatuko da baina oraingoan azpitituluak euskaraz izango dira. Izan ere, bai abenduko saioetan bai Mendi Tourreko ekitaldietan euskara handitzearen aldeko apustua egiten ari da MENDI zinemaldiaren antolakuntza. Euskaraz egiten diren azpitituluen kopuruaren gorakada BILBAO MENDI FILM FESTIVALek eta ZINEUSKADIk sinatutako lankidetza-akordioaren ondorioa da. ZINEUSKADIk sostengu estrategikoa eskaintzen die ikusentzunezko euskal sektoreko enpresa eta profesionalei euren hedapen eta garapenean, Estatu eta Europa mailan, eta nazioarte mailan.

IGORREKO MENDITOURREKO bigarren jardunaldiak, martxoaren 13an, era guztietako pelikulak eskainiko ditu: Mission Antarctic, 2T on Paiju Peak eta Drawn.

Guido Perrinik zuzendutako 38 minutuko Mission Antarctic  pelikula frantziarrarekin hasiko da bigarren jardunaldia. Xavier de Le Ruek mundu bukaerara egindako espedizioaren istorioa da. Freerideko munduko txapelduna, Lucas Debari lankidearekin batera, paradisu berri baten bila ibili zen. Nabigazioaren, alpinismoaren, snowboardaren, bizitza basatiaren eta ezusteko aurkikuntzaren nahaste bat da kontakizuna.

MISSION ANTARCTIC - trailer from TimeLine Missions on Vimeo.

Ondoren 2T on Paiju Peak filmak gaia aldatuko du eta emozio-ukitua jarriko arratsaldeari. Lana "Walk On Project"ek ekoitzi du, arruntak ez diren gaixotasun neurogegeneratiboen ikerketan laguntzen duen fundazioak. Karen Solek zuzentzen du 27 minutu dituen eta ausardia eta konpromisoari buruz mintzatzen den pelikula hau. Alberto Iñurrategik, Juan Vallejok eta Mikel Zabalzak Paiju Peak igotzeko egin zuten saiakera WOP fundazioko jatorri, historia eta baloreekin gurutzatzen da, pasioz eta emozioz beteriko ibilbidean.

Martxoaren 13ko emanaldia Drawn filmak itxiko du. Pelikula hunkigarri honek BILBAO MENDI FILM FESTIVALeko Gidoi Onenaren Saria eta mendizaletasunaren giza-balioen defensa eta transmisioari WOP Fundazioak eskaintzen dion Saria irabazi zituen.

Drawn trailer from Jeremy Collins on Vimeo.

Drawn 2014ko ekoizpen estatubatuarra da eta Jeremy Collins eskalatzaile eta artista du zuzendari, produktore eta protagonista. Lagun bat elur-jausi batean hil eta gero, Collinsek lau urtetan egindako bidaia kontatzen du pelikulak. Lau norabide jorratu zituen: Venezuelatik Txina eta Mongoliara, Kanadatik Yosemiteko haranera. Bidean bere marrazteko koadernoa bete zuen, eta ikasi zuen zertarako jaio den eta bizitza honetan nor izan eta nora joan nahi duen. Arte eta abenturaren nahastea den Drawn pelikulan adiskidetasunari eta familiari buruzko istorio bat kontatzen da, modu erabat originalean.

drawn

Mission Antarctic  eta  Drawn jatorrizko bertsioan proiektatuko dira, ingelesez, gaztelaniazko azpitituluekin. 2T on Paiju Peak pelikula, berriz, gaztelaniazko jatorrizko bertsioan proiektatuko da.

Laburbildurik, hona hemen IGORREKO MENDITOURREKO programazio osoa:

MARTXOAREN 6a, OSTIRALA

•   Afterglow (kirol eta abenturako film laburra, AEB, 2014,12’, ingelesez+azpitituluak euskaraz).

•   Valley Uprising (eskaladako film luzea, AEB, 2014, 98’, ingelesez+azpitituluak gaztelaniaz).

MARTXOAREN 13a, OSTIRALA

•    Mission Antarctic (kirol eta abentura, metraje ertaineko filma, FRANTZIA 2012, 38’, ingelesez+azpitituluak gaztelaniaz).

•    2T on Paiju Peak (mendia, metraje ertaineko filma, ESPAINIA, 2014, 25’, gaztelaniaz).

•    Drawn (eskalada, metraje ertaineko filma, AEB, 2014, 40’, ingelesez+azpitituluak gaztelaniaz).

IGORRE MENDITOURRAK Gandazabal Mendi taldearen eta Igorreko Kultur Etxearen babesa dauka, bai eta Zineuskadiren laguntza ere. Bi jardunalditan egingo da Igorreko Kultur Etxearen Lasarte Aretoan (Elexalde 8, Igorre), 19:30etan. Auditoriumak 300 lagunentzako lekua dauka eta sarrerak doakoak izango dira.

20Oct/140

123 film aurkeztu dira Mendi zinemaldiaren 7. edizioan parte hartzeko asmoz

mendi7

22 herrialdetako 123 filmek dute aukera Bizkaiko hiriburuak abenduaren 12tik 21era izango duen MENDI FILM FESTIVAL zinemaldiaren 7. edizioan parte hartzeko. Antolakuntzak aurki hautatuko ditu lehiaketan ofizialki arituko diren 40 filmak.

Mendi Zinemako Nazioarteko Jaialdi honen 7. edizioan parte hartzeko aukera duten filmei dagokienez, Frantziak du ordezkari gehien: 28 film. Erresuma Batuak, bestetik, 18 pelikula aurkeztu ditu, Espainiak 13, Estatu Batuek eta Euskadik hamarna, Austriak zazpi eta Italiak sei. Argentinako, Belgikako, Kanadako, Suitzako, Alemaniako, Poloniako, Kolonbiako, Indiako, Hegoafrikako, Suediako, Brasilgo, Irlandako, Egiptoko, Danimarkako, Eslovakiako eta Australiako lanak ere aurkeztu dituzte; beraz, bost kontinenteetako ordezkariak daude hautagaien artean.

BILBAO MENDI FILM FESTIVALeko sail ofizialean parte hartzeko hautatutako pelikulek -40 eta 50 artean antolakuntzaren balioespenen arabera-, aukera dute zuzendari onenaren, gidoi onenaren, argazkigintza onenaren, laburmetrai onenaren eta epaimahaiaren sariak bereganatzeko, mendi, eskalada, abentura eta kultura eta natura azpi-kategorietan.

9Oct/140

MENDI ZINEMALDIAK LEHENENGO FILM LABURREN LEHIAKETARAKO DEIA EGIN BERRI DU

MENDI FILM FESTIVALek, Mendi eta Abentura Kirolen Nazioarteko Zinemaldiak, zazpigarren edizioa izango du aurten abenduaren 12tik 21era Bizkaiko hiriburuan, eta atal berria edukiko du profesionalak ez diren bideo-sortzaileen talentua sustatzeko. Sail berri honek Mendi Short 2014 du izena eta film labur amateurren lehiaketa bat da.

Txapelketa nazioarte mailakoa da, eta MENDI zinemaldiaren kasuan bezalaxe, mendiaren inguruko gaiei lotuta dago: alpinismoa, eskalada, abenturako kirolak, eskia, muturreko kirolak, ekologia, ingurugiroa, etnografía… Lanek 5 minutuko iraupena izango dute gehienez, 2014an egindakoak izan beharko dute, eta horiek aurkezteko epea azaroaren 15ean bukatuko da.

Ikusentzunezko sektoreko profesional ospetsuez osatutako epaimahaiak abenduaren 5ean jakinaraziko du bere erabakia. Lan irabazlea BBK Aretoan proiektatuko da MENDI FILM FESTIVALeko lehen asteburuan. Izena-emateko informazio eta zehaztasun guztiak www.mendifilmfestival.com webgunean aurki daitezke.

mendishort_2014

24Apr/140

Donostian izango dira aurki Mendi Film Festival zinemaldiko film onenak eta Jimmy Chinen argazki erakusketa zoragarria

mendi film festival donostia

MENDI TOUR DONOSTIA Gipuzkoako hiriburura iristear da aurten ere, eta Mendi Tourren eskutik, MENDI FILM FESTIVAL zinemaldian proiektatutako mendiko eta abenturazko film onenak ikusteko aukera. Aurten, gainera, pelikulen proiekzioaz gain, jarduera alpinoarekin loturiko bi erakusketa ere izango dira, argazkiena bat, eta Poloniako himalayismoari buruzko bi komikirena, bestea. Bi erakusketa hauek Club Vasco de Camping elkartearekin elkarlanean antolatu dira. 1950ean eratu zen mendi talde hori eta gaur egun 4.000 bazkide baino gehiago dira elkartean.

Hori gutxi balitz, Orona Fundazioak bat egin du aurten MENDI TOUR DONOSTIA ekimenarekin, eta emanaldi berezi bat eskainiko du Galarretako Parke Teknologikoan, Hernanin.

Jimmy Chin Bretxako azokan

JIMMY_CHINHorrenbestez, indar eta bultzada berezia hartuko du aurten MENDI TOUR DONOSTIAk; izan ere, mendiko filmen proiekzioaz gain, jarduera alpinoari buruzko bi erakusketa ederrez lagunduta dator egitaraua. Lehena, Jimmy Chin argazkilari estatubatuar entzutetsuaren formatu handiko 18 irudi ikusgarriz osatutako erakusketa izango da, apirilaren 25etik aurrera. Bretxako azokan, bai merkataritza-gunean bertan bai eraikinaren kanpoaldean paratuko dira argazkiak. Irudien artean dira Kanadako Bugaboos mendilerroko argazkiak, Txadeko formazio ikusgarrietakoak, Yosemiteko hormak, Half Domeko eskaladako irudiak, Himalayakoak… Eta naturako argazkiez gain, protagonisten erretratuak ere badira, eskalatzaileak eta mendizaleak jarduera bete-betean, edo atseden uneetan.

Hala, donostiarrek eta egunotan Donostia leporaino betetzen duten turistek, milaka lagunek, izango dute aukera Jimmy Chinen (Minnesota, 1973) lana ederresteko. Chin, goi-mailako eskalatzaile, mendizale eta eskiatzaile izateaz gain, zinema zuzendaria eta argazkilaria ere bada,  onenetakoa. The North Face taldeko kide izan da hainbat urtez, eta eskalada, eski zeharkaldi eta esplorazioko bidaia eta espedizio askoren gidari ere bai mundu osoan barna: Txinan, Pakistanen, Nepalen, Tanzanian, Txaden, Malin, Hego Afrikan, Borneon, Indian, Argentinan…

Towers of the Ennedi filmaren fotograma © Jimmy Chin

Towers of the Ennedi filmaren fotograma © Jimmy Chin

Hainbat lorpenen artean, eskiatzen jaitsi da Everesteko tontorretik, Karakorum eta Himalayako zenbait horma handi edo big wall eskalatu ditu lehen aldiz, Chang Tangeko goi-lautada zeharkatu du Tibeten, edo Everesteko ipar aurpegia eskalatzen saiatu da era alpetarrean. Bestalde, argazkilari aparta dela esan beharrik ez dago; horren adierazle dira, National Geographic, Outside, Men’s Journal eta entzute handiko beste hainbat agerkaritan argitaratutako bere irudiak.

“Freedom Climbers”  Club Vasco de Camping elkartean

Bigarren erakusketa Club Vasco de Camping elkartearen erakusketa-aretoan aurkeztuko da, maiatzaren 5etik aurrera. “Poloniako himalayismoaren urrezko aroa” deritzon garaiko bi mugarriri buruzko komiki erakusketa izango da eta, hain zuzen, “Ice Warriors” eta “Lho La Tragedy” komikien jatorrizko plantxak izango dira ikusgai. Bata, 1980an neguan Everest lehen aldiz igo zuen espedizioari buruzkoa da, eta bestea, 1989an mendi berean bost alpinista poloniarren heriotza eragin zuen zorigaitzari buruzkoa.

Ice Warriors

Ice Warriors

Poloniako Kultura Institutuaren laguntza bereziari esker, “Freedom Climbers” (Askatasunaren Eskalatzaileak) erakusketa Vasco de Camping elkartearen aretoan izango da ikusgai (Gernikako Arbolaren pasealekua, Prim kalearen 35. zenbakiaren parean), maiatzaren 5etik ekainaren 15era, 16:30etik 20:30era. Sarrera doan izango da eta zabalik egongo da Poloniako goi-mendizaletasunaren garai loriatsuaren berri jakin nahi duten guztientzat.

Eskalatzaile poloniarrak Katowice-ren tximinietan ogibidearen bila. Krzysztof Wielicki-ren argazkia

Eskalatzaile poloniarrak Katowice-ren tximinietan ogibidearen bila. Krzysztof Wielicki-ren argazkia

Beste alde batetik, egun berberetan Art of Freedom filma, herrialde hartako alpinisten igoera gogorrenei buruzko lana, proiektatuko da etenik gabe aretoan.

Filmen proiekzioak

Mendiko filmen egitarauari dagokionez, bi saio izango dira, maiatzaren 6 eta 8an, Principal Antzokian. Beraz, maiatzaren 6an, asteartez, eta maiatzaren 8an, ostegunez, aukera paregabea izango da MENDI TOUR DONOSTIA ekimenaren eskutik azken aldiko mendiko film onenez gozatzeko. Bi saioak 19:30ean hasiko dira, sarrera 5 euro izango da saio bakoitzeko, eta filmak jatorrizko bertsioan proiektatuko dira, euskarazko eta gaztelaniazko azpidatziekin.

Lehen saioan, maiatzaren 6koan, film hauek proiektatuko dira:

•    High Tension (AEB 2013, 36’), mundu osoan hedabideetako titularrak bereganatu zituen istiluaren kontakizuna. Sumindutako sherpa talde batek eraso egin zien eliteko bi alpinistari, Ueli Steck suitzarrari eta Simone Moro italiarrari, Everesteko bigarren kanpalekuan, eta ia hantxe bertan lintxatu zituzten harrika.

•    The Sensei (AEB 2013, 26’) Yuji Hirayama da protagonista, eskalada modernoaren kondaira handietako bat. Erretiroa hartzear, bere azken balentria burutzen saiatuko da, Borneo uharteko Kinabalu mendian inoizko eskaladarik ikusgarri eta gogorrenetako osatzen, Daniel Woods boulder-eko eskalatzaile estatubatuar gaztea lagun duela.

Yuji Hirayama (5.14d) a 13,000 pies de altura en el Mt Kinabalu, Borneo. Foto Chuck Fryberger

Yuji Hirayama (5.14d) Borneoko Kinabalu mendian. Argazkia: Chuck Fryberger

•    The Last Great Climb (Erresuma Batua 2013, 60’) filmak Leo Houlding eta bere taldearen abentura jasotzen du iruditan: Antartikan, Queen Maud Land lurraldeko Ulvetanna mendi zorrotz eta ikusgarriaren (2.931 m) IEko ertzean eginiko eskalada; munduko lekurik gogorrenetako batean zailtasun tekniko goreneko bidea. Ulvetannakoa, gainera, Sean ‘Stanley’ Leary eskalatzaile estatubatuarraren azken espedizioetako bat izan da, oraindik orain, martxoaren 13an, Zioneko Parke Nazionalean (Utah, AEB) BASE jauzia egiten ari zela istripua izan eta hil baitzen Leary.

"Stanley" paretako lehengo tarteari ekinez.

Maiatzaren 8an, bi film labur eta dokumental bat proiektatuko dira Principal Antzokian, biak jatorrizko bertsioan, euskarazko eta gaztelaniazko azpidatziekin:

•    A Temporada (Brasil 2013, 4’ 30”) eskaladako proiektu batean oinarritutako animaziozko filma.
•    Cascada (AEB 2013, 8’), muturreko piraguismoko irudi ikusgarriz ondutako pelikula; film labur onenaren Eguzkilore saria izan zen  MENDI FILM FESTIVAL zinemaldiaren azken edizioan.

CASCADA-THE-TEASER
•    Messner Der Film (Alemania 2012, 104’), zuzendari onenaren Eguzkilore Saria, azken MENDI FILM FESTIVALen. Filmak Reinhold Messner alpinista handiaren bizitza eta nortasun konplexua hezurmamitzen du, haren lorpenen irudiak, protagonistari eginiko elkarrizketak eta sokakideen eta senideen lekukotzak uztartuz.

Messner HD from Mendi Film Festival on Vimeo.

20Feb/140

Red Bull­‐ek trailer ikusgarria egin du “Cerro Torre” filmeko lehen irudiekin, nazioarteko bere birarako

menditourFilma MENDI TOUR zikloan ikusi ahal izango da Espainian. Mendi Film Festival zinemaldian proiektatutako film onenen zikloa da MENDI TOUR, eta hainbat herri eta hiritan antolatzen dira saioak.

Datozen hilabeteetan, MENDI TOUR herri hauetan izango da:

  • Leioan (martxoak 10 eta 12), Tolosan (martxoak 17, 18 eta 19), Igorren (martxoak 21 eta 28), Donostian (maiatzak 6 eta 8) eta Arrasaten (maiatzak 13).

  • CERRO TORRE lanak mendiko film onenaren Eguzkilore saria eskuratu zuen Mendi Film Nazioarteko zinemaldian.

Cerro Torre_img_17605

“Eskaladaren eta alpinismoaren esentzia hobekien islatzen duen mendia da Cerro Torre. Meteorologia gaiztoa, tenperatura oso hotza, haize bortitzak eta zailtasun tekniko handiko bideak. Horra hor alpinismoaren ikur honen eta bertan izan diren igoeren epika eta kondaira gizendu duten osagaiak. Haitz zorrotz honen hormetan idatzi dira alpinismoaren historiako orrialderik garrantzitsuenetako batzuk.

Batzuk, zalantzaz, gezurrez eta polemikaz zipriztinduak; baina guzti-­‐guztiak ahalegin eta izerdi eskergaz josiak, eskaladaren mugetatik harago. Cerro Torre historiaz jositako filma da. Protagonista nagusia, David Lama, kirol eskaladako lehiaketa “erosoetatik” alpinismo basatienera daraman zidorrean menturatuko da, hasiberriek gainditu beharreko bide luze eta gogorrean”. Jabier Baraiazarra, Mendi Film Festival zinemaldiaren zuzendaria

29Jan/140

Mendi Film Festival zinemaldiaren onena Gasteizen

MendiTourGasteiz

Mendi eta abenturazko zinemaren nazioarteko jaialdian proiektatutako film onenak ikusi ahal izango dira urtarrilaren 29, 30 eta 31n Vital Kutxaren Fundación Aretoan, Dendaraba merkataritza-zentroan

• “Cerro Torre” filma izango da zinema-genero hau maite dutenen erakargarri nagusietakoa; jaialdiaren azkeneko edizioan mendiko film onenaren garaikurra jaso zuen pelikula

• Gasteizko ikus-entzuleek zortzi film ikusi ahal izango dituzte guztira, horietatik bost MENDI zinemaldiaren 6. edizioko palmaresean hainbat kategoriatan garaikurrak lortu zituzten lanak

• Zortzi filmetatik hiru euskarazko azpidatziekin proiektatuko dira, ZINEUSKADI elkartearekin sinatutako lankidetza-hitzarmenari esker. Ikus-entzunezkoen euskal sektorea laguntzeko elkartea da ZINEUSKADI

Mendiko eta abenturazko nazioarteko zinema onena ikusteko aukera izango da urtarrilaren 29, 30 eta 31n Gasteizen, MENDI FILM FESTIVAL jaialdiaren eskutik, eta Estadio Fundazioaren eta Vital Kutxaren Gizarte Ekintzaren babesean. Hain zuzen, Vital Kutxak bere lokalak utziko ditu emanaldietarako. Abian da, beraz, MENDI TOUR ekimenaren aurtengo edizioa, eta iaz bezala, Gasteizen abiatuko da aurten ere ziklo ibiltari hau. Hala, ekimen honi esker, mendiko zinemaldian izan diren film nabarmenenak Euskal Herriko hainbat herritan ikusteko aukera izango dute zaleek.

Guztira zortzi film proiektatuko dira Vital Kutxaren Fundación Aretoan (La Paz kalea, 5, Dendaraba merkataritza zentroa). Zortzi horietatik bost sarituak izan dira berriki bukatu den MENDI FILM FESTIVAL jaialdiaren azken edizioan, besteak beste Cerro Torre lana, mendiko film onenaren aitortza jaso zuen pelikula.  Gasteizko MENDI TOUR zikloan proiektatuko dira beste hauek ere: film labur onenaren saria (Cascada), gidoi onenarena (Art of freedom), kirol eta abenturazko film onenaren garaikurra (Steps) eta eskaladako film onena (The Sensei).

Cerro Torre, Patagoniako natura miresgarrian ondutako filma

Cerro Torre filma izango da zinema-genero hau maite dutenentzako erakargarri nagusietako bat. Austriako ekoizpen bat da, 2013koa, Thomy Dirnhoferrek zuzendua eta 100 minutukoa. Patagoniako natura miresgarrian kokaturik, filmak David Lama eta Peter Otnerrek osatutako sokaldiaren asmoa jasotzen du iruditan: Cerro Torre mendiaren hego-ekialdeko horma ospetsua lehen aldiz era askean eskalatzeko ahalegina, hain zuzen. Munduko mendirik zailenetako baten aurpegirik basatiena librean eskalatzeko saioa, alegia. Era guztietako erronka natural eta logistikoei aurre egin ondoren, egitasmoaren egiazko tamainaz ohartzen hasiko da David, bai eta gailurra jotzeko gainditu beharko dituen zailtasun eta eragozpen guztiez ere.

Cerro Torre_img_17605

Cascada, film labur onenaren saria, “ur-jauzi perfektuaren” bilaketaren kontakizuna da, piraguista batzuek Mexikoko oihaneko ur-salto ikaragarrietan filmatutako irudi liluragarriz ondutako lana. Anson Fogel eta Skip Armstrong dira zazpi minutuko labur iparamerikar honen zuzendariak.

CASCADA-THE-TEASER

Art of freedom (Polonia, 2011), Wojciech Slota eta Marek Klosowicz zuzendarien lana, iraupen ertaineko filma da (70 min). Poloniako espedizio zail eta igoera gogor eta ikusgarrienen historia jasotzen duen filma, eta, orobat, himalayismoaren esentzia hezurmamitzen duen ikus-entzunezkoa: baldintzarik muturrenekoetan giza gorputzaren ahultasunak gainditzeko grina hori, hain zuzen.

Eskalatzaile poloniarrak Katowice-ren tximinietan ogibidearen bila. Krzysztof Wielicki-ren argazkia

Eskalatzaile poloniarrak Katowice-ren tximinietan ogibidearen bila. Krzysztof Wielicki-ren argazkia

Steps (Suitza, 2013), Philipp Eyer eta Stephan Hermann zuzendarien dokumentala (50 min), klima errespetatzen duen snowboard eta eskiko lehen filma da. Protagonistek ahalegina egingo dute beren pasioa beste era batera praktikatzeko, mendiaz ekologikoki modu jasangarrian gozatzeko. Munduan barna elurraren bila hegazkinez bidaiatu ordez, etxe ondoko Alpeak esploratuko dituzte, garraiobide publikoetan bidaiatuko dute batera eta bestera, eta, inolako laguntzarik gabe, bakar-bakarrik, igo eta jaitsiko dituzte gailur garai eta ikusgarrienak.

The Sensei (AEB, 2013) 26 minutuko iraupen ertaineko beste film bat da, Josh Lowell, Peter Mortimer eta Nicholas Rosenek zuzendua. Yuji Hirayama da protagonista, eskalada modernoaren kondaira handietako bat. Erretiroa hartzear, Hirayama bere azken balentria burutzen saiatuko da, Borneo uharteko Kinabalu mendian inoizko eskaladarik ikusgarri eta gogorrenetako bat osatzen. Baina aurrez, lagun egokia aurkitu beharrean da Hirayama, eta horra hor non agertuko zaion Daniel Woods, blokeko eskalatzaile estatubatuar gaztea, espezialitate horretan munduko indartsuenetakoa, baina eskarmentu gutxikoa mendian. Ezohiko bikote hau eskuz esku ariko da beren bizitzako espedizioan.

Azpidatziak euskaraz eta ZINEUSKADIrekin sinatutako hitzarmena

MENDI TOUR ekimenaren lehen emanaldi honetako zortzi pelikulak jatorrizko bertsioan proiektatuko dira eta horietatik hiru (Cascada, Crossing the ice eta Valhalla) euskarazko azpidatziekin. Mendiko zinema jaialdiaren antolatzaileak ahalegin eskerga egiten ari dira urterik urte zinemaldian euskararen presentzia areagotzeko, eta horren fruitu izan da MENDI FILM FESTIVAL jaialdiak eta ZINEUSKADI elkarteak sinatutako lankidetza-hitzarmena. Aurtengo edizioan, euskaraz azpidatzitako film gehien-gehienak hitzarmen eta lankidetza horren eskutik etorri dira. Ikus-entzunezkoen euskal sektoreari eta bertan diharduten enpresa eta profesionalei laguntza estrategikoa ematen dien elkartea da ZINEUSKADI, Espainian, Europan eta nazioartean sektore eta profesional horien garapena eta hedapena bultzatzeko.

Halaber, ZINEUSKADI elkartearen xedea da sare profesionalak sortzeari bultzada ematea, bai eta Europako zinema eta ikus-entzunezkoen aniztasuna eta ondarea babestea ere, merkatuan ahalmen gutxiago izan dezaketen ekoizpenei edo hizkuntza gutxituetan egindakoei arreta berezia jarrita. Hain zuzen, jaialdiaren azken edizioan lehian izan ziren 40 lanetatik 15 euskarazko azpidatziekin proiektatu ziren.

Sei urteko ibilbide laburrean, mendiko zinemaren arloko nazioarteko erreferentzia bihurtu da MENDI FILM FESTIVAL. Zinemaldiaren asmoetako bat, gainera, beti izan da leihoak Euskal Herri osora zabaltzea, eta horixe da, hain zuzen, MENDI TOUR ekimenaren funtsa: jaialdiaren azken edizioan, 2013ko abenduaren 13tik 22ra lehian izan diren 40 film horien lagin esanguratsuena herriz herri ikusteko aukera eskaintzea.

Hona hemen Gasteizko MENDI TOUR zikloaren egitarau osoa:

ASTEAZKENA, URTARRILAK 29

•    Cascada (piraguismoko film laburra, 8’).
•    Sea of rocks (mountain bikeko film laburra, 12’).
•    Cerro Torre (alpinismoko filma, iraupen ertainekoa, 100’).

OSTEGUNA, URTARRILAK 30

•    Art of freedom  (alpinismoko filma, iraupen ertainekoa, 70’).
•    Steps (snowboardeko filma, iraupen ertainekoa, 50’).

OSTIRALA, URTARRILAK 31

•    Crossing the ice (zeharkaldi polar bati buruzko iraupen ertaineko filma, 44’).
•    Valhalla (eskiko filma, iraupen ertainekoa, 60’).
•    The Sensei (eskaladako filma, iraupen ertainekoa, 26’).

Hiru saioak Vital Kutxaren Fundación Aretoan izango dira, Dendaraba merkataritza-gunean (La Paz kalea, 5-1, Gasteiz), 19:00etatik aurrera. Sarrerak 4 euro kostako dira (3 euro Estadio Fundazioko bazkideek, baldin eta sarrera Estadio fundazioan bertan jasotzen badute). Gaur bertan, urtarrilak 22, jarriko dira salgai sarrerak, Estadio Fundazioaren harreran (astelehenetik ostiralera, 09:00etatik 20:00etara) edo 17:00ak arte saioaren egunean bertan.

Mendi Tour zikloa Gasteizen izango den egunetan ere erosi ahal izango dira sarrerak Vital Kutxaren Fundación Aretoko (Dendaraba) txarteldegian bertan, 18:15etik 18:55ak arte, edukiera agortu arte.

MENDI TOUR EKIMENARI BURUZ

Mendi Tour ekimena batetik bestera ibiliko da urte osoan, Mendi Film Festival jaialdiaren azken edizioko film onenak eta txalotuenak eskaintzen, baita Mendi-ren artxiboko lan entzutetsuenak ere, hala nahi izanez gero. Zikloa hainbat formatutan aurkezten da: egun bakarra, bi egun, hiru… Antolatzaileak ere era askotakoak izan dira orain arte: erakundeak, eskolak eta ikastetxeak, elkarteak, talde komunitarioak eta kultura-aretoetako operadoreak.

Han eta hemen Mendi Tour hartzen duten antolatzaileek nahi duten egitaraua aukera dezakete, tokian tokiko ikus-entzuleentzat interesgarrien irizten dutena. Mendiko, esplorazioko, abenturazko, kulturako eta ingurumenari buruzko hainbat tituluren artean bada non aukeratu.

Ekimen ibiltari honen bidez, Mendiko eta abenturazko Zinema Jaialdiaren helburua da gero eta jende gehiagorengana iristea, eta hango eta hemengo herritarrei istorio harrigarri eta zirraragarriak ezagutzeko aukera eskaintzea, barrua mugiarazten eta akuilatzen duten ikus-entzunezko ederrak.

24Dec/130

Datorren urtera arte Mendi!

IMG_0337bis

Tira ba, Mendi Film Festivala amaitu zaigula horra hor bideo honetan begirada azkar bat zortzi egunotan bizi izandakoari:

10Dec/130

MENDI FILM FESTIVAL zinemaldiak Poloniako himalayismoa omenduko du aurten

himalayismo poloniarra

Alpinista poloniarrek Himalayan eginiko balentriei arreta berezia jarriko die aurtengo ekitaldian MENDI FILM FESTIVAL jaialdiak. Horretarako, bi jarduera programatu ditu “Poloniako himalayismoaren urrezko aroa” esan izan zaionaren mugarri nagusiak berrikusteko; eta, horrez gain, alpinista horietako batzuk ekarriko ditu Bilbora.

Alde batetik, gaurdanik abenduaren 22ra arte, ‘Art of Freedom’ filma, herrialde hartako alpinisten igoera gogorrenei buruzko lana, proiektatuko da etenik gabe REKALDE aretoan. Emanaldi jarraitu horrez gain, sail ofizialean ere lehiatuko da dokumentala.

Bestetik, berriz, ‘Ice Warriors’ eta ‘Lho La Tragedy’ komikien erakusketa izango da Rekalde aretoan bertan. Bi komikiak propio itzuli dira euskarara eta gaztelaniara, erakusketa honetarako.  ‘Ice Warriors’ (‘Izotzetako Gerlariak’) komikiak Everesteko neguko lehen igoera, 1980an Krysztof Wielicki eta Leszek Cichy alpinistek burutua, laburbiltzen du binetatan. Wielickiren beraren egunerokoan du oinarria komikiak. ‘Lho La Tragedy’ (‘Lho Lako tragedia’) lanak, berriz, 1989an Everesteko mendebaldeko ertzean bost mendizaleren heriotza eragin zuen zorigaiztoa berritzen du. Jerzy Porebsky, filmaren ekoizlea eta bi komikien gidoilaria, erakusketan izango da abenduaren 16an, astelehenez, Bernadette McDonaldekin batera (komikietako batean laguntzaile izan zuen McDonald).

Lho Lako tragedia’

Lho Lako tragedia’

Bestalde, abenduaren 17an, asteartez, 20:00etatik aurrera neguko himalayismoari eta zortzimilakoak muturreko baldintzetan igotzeari buruzko mahai-inguru mamitsua izango da BBK aretoan. Bertan ariko dira, batetik, Krysztof Wielicki eta Adam Bielecki poloniarrak (aurreko martxoan Broad Peakeko neguko lehen igoeran bi taldekide galdu zituzten espedizioko kideak) eta Denis Urubko kazakhstandarra, gaur egungo munduko alpinistarik onenetako hiru; eta bestetik, Bernadette McDonald idazle kanadarra eta Poloniako himalayismoa sakon aztertutako pertsona, eta Oscar Gogorza kazetaria eta mendizale aditua.

Rekalde aretoko beste jarduera batzuk

MENDI FILM FESTIVAL jaialdiko beste zenbait jarduera paralelo ere hartuko ditu Bizkaiko Foru Aldundiaren galeriak:

-    ‘Txiki Mendi Klik’ mendiko eta naturako argazkigintza-tailerra, 7 eta 12 urte arteko haurrentzat, Santi Yaniz argazkilariaren eskutik, abenduaren 14an, 10:00etatik 13:00etara.
-    ‘Mendiagaz’, gazteentzako film laburren proiekzioa, abenduaren 10etik 22ra. Bost lan hautatu dira (hiru animaziozkoak), ordubete inguruko emanaldia osatzeko. Egunero hiru saio izango dira: 10:30ean, 12:30ean eta 18:00etan.

30Nov/130

MENDI FILM FESTIVAL JAIALDIAK MENDIKO ZINEMA ONENA ETA PROTAGONISTEN LEKUKOTZAK UZTARTUKO DITU BILBON

Abenduaren 13tik 22ra, Bizkaiko hiriburua mendiko eta abenturazko zinema onenaren topagune bihurtuko da berriz ere, MENDI FILM FESTIVAL jaialdiaren seigarren edizioaren eskutik. Urte gutxitan, genero horretako nazioarteko zinemaldi onenen artean lekua egin du gure MENDI FILM zinemaldiak. Lehiaketarako hautatutako 40 filmen proiekzioaz gain, nazioarteko sona handiko gonbidatu asko ekarriko du zinemaldiak Bilbora, eta jarduera paralelo ugari ere antolatu ditu, zazpigarren artea eta mendizaletasunaren aldaera guztiak uztarri berean loturik.

Aukera paregabea da, beraz, mendiko eta aire libreko abenturazko kirolei buruzko film dokumental onenak ikusteko. Izan ere, eskalada, alpinismo eta goi-mendiko filmez gain, surf, eski, snowboard, mountain bike, BASE jauzi, mendiko lasterketa, piraguismo, espeleologia eta beste hainbat jarduerari buruzko lanak izango dira ikusgai. Eta emanaldi horiez gain, MENDI FILM FESTIVAL jaialdiak jarduera paraleloen egitarau oparoa prestatu du, beren esperientziaren lekukotza zuzena ekarriko duten zuzendari eta kirolari handien eskutik.

FILMAK: 27 HERRIALDETAKO 40 HARRIBITXI IZANGO DIRA LEHIAN ETA AUKERA BAKARRA DA HORIEK IKUSTEKO

Seigarren edizio honetan, MENDI FILM FESTIVAL jaialdiak 40 film programatu ditu lehiaketarako, 2013ko edizio honetan 27 herrialdetatik aurkeztu diren 120 lanen artean hautatutako 40 harribitxi.

Euskalduna jauregia, BBK aretoa, Alhondigako auditoriuma eta Rekalde aretoa izango dira zinemaldiaren lau egoitzak. Abentura bikainei buruzko irudi ikusgarriak proiektatuko dira guztietan, baldintza tekniko hoberenetan. Aurten, 3D formatuko saio bat ere izango da egitarauan: Zelanda Berriko ekoizpen bat da, Beyond the edge, Edmund Hillaryk eta Tenzing Norgayk Everestera eginiko lehen igoerari buruzkoa, hiru dimentsiotan ikusteko teknologian egina.

MENDI FILM FESTIVAL jaialdia mundu osoko mendiko eta abenturazko zinemaldi onenetakoa bihurtu da denbora-tarte laburrean. Aurtengo edizioan ere generoko egile onenak izango dira Bilbon, alpinismoren eta abenturaren munduan mitikoak diren tokien ikuspegi guztiz berriak eskaintzen: Alpeetatik Himalayara, Hego Polotik Patagoniara, beste hainbat paraje ahaztu gabe (Karakorum, Groenlandia, Borneo, Andeak, Koloradoko zintzurra, Mexikoko eta Venezuelako oihanak...).

Filmen protagonisten artean ere denetarik dago: alpinismoaren kondaira biziak, batzuk, eta abenturazale gazteak, beste batzuk, inoiz saiatu gabeko erronka bat gainditzen lehenak izan nahian. Hala, egitarauaren xedea da era guztietako zaleak erakartzea: zinemazaleak, nola ez, baina baita naturan egindako muturreko kirolen zaleak ere. Ahaztu gabe lehiaketara aurkezten diren zenbait lanen osagai kulturala, giza intereseko istorioak, ingurumenaren aldeko aldarria edota umore-ikuspegia.

NAZIOARTEKO EPAIMAHAIAK HAUTATUKO DITU 11 EGUZKILOREAK

Eguzkilorea; Mendi zinemaldiaren sarien ikurra

Abenduaren 21ean, larunbatez, Mendiko Zinemaldiaren itxierako saioan, Nazioarteko epaimahai batek aukeratuko ditu lehian izan diren 40 filmen artean 11 eguzkiloreak: film onena, zuzendari onena, gidoia, argazkia, film labur onena, euskarazko film onena, mendizaletasunari buruzko film onena, eskaladako film onena, abenturazko kirolen film onena, natura eta kulturari buruzko film onena eta epaimahaiaren saria. Ikus-entzuleek, berriz, publikoaren saria bozkatzeko aukera izango dute.

Hauek dira MENDI FILM FESTIVAL jaialdiaren aurtengo edizioko nazioarteko epaimahaikideak: Bernadette McDonald (Kanada), mendizaletasunari eta mendiko kulturari buruzko zortzi libururen egilea (nazioarteko sari nagusienak eskuratu ditu lan horiekin) eta National Geographic Expedition Council nazioarteko aholkularitza batzordeko kidea, besteak beste.

Aritz Galarza (Euskal Herria), telebistako ekoizlea eta zuzendaria, ETBko fikziozko saioen programatzailea eta beste hainbat saioren ekoizle-eragilea, baita zinemagilea ere, berriki kaleratu da bere estreinako lana, “A la Bizkaina” dokumentala, Donostiako Zinemaldiko azken edizioan “Culinary Zinema” sekzioan hautatua.

Evrard Wendenbaum (Frantzia) esploratzailea, hizlaria, argazkilaria eta film dokumentalen egilea, goi-mailako kirolaria, eta eskiko, arroiletako, eskaladako, itsasoko kayakeko eta alpinismoko jarduera askotan aitzindaria (hainbat mendigunetan lehen esplorazioak egina da eta bere espedizioen dokumentalak sarituak izan dira hainbat jaialditan).

Marco Preti (Italia) bere belaunaldiko eskalatzailerik onenetakoa, 1978. urteaz geroztik film askoren zuzendari, gidoigile eta editorea, nazioarteko jaialdi askotan sari ugari jasotakoa, baita MENDI FILM FESTIVALen ere, eta idazlea (bere lehen eleberria, “Il ghiacciaio di nessuno”, best-sellerra da); eta Martin Kanuch (Eslovakia) herrialde hartako Zinema Institutuko Argitalpen Saileko kidea, zinema ikasketei buruzko aldizkari baten editore burua eta Txekoslovakiako Zinema Ikasketen hitzaldi-programen koordinatzailea, artikulugilea zinemako beste hainbat agerkaritan eta nazioarteko jaialdietan programatzaile lanetan aritutakoa.

JARDUERA PARALELOAK

•  BILBOKO METROKO GELTOKIAK: Jimmy Chinen erakusketa

Abenduaren 2tik 30era Abando, Moiua eta Alde Zaharrean

• Rekalde ARETOA: MENDIAGAZ, gazteentzako zinema-proiekzioa; abenduaren 9tik 20ra

The Ice Warriors” eta “The Lho La Tragedy” komikien erakusketa

Ice Warriors

Tragedia en Lho La lawina

...eta  Art of Freedom filmaren etenik gabeko proiekzioa; abenduaren 10etik 21era

"Art of Freedom" from Culture.pl on Vimeo.

7 eta 12 urte bitarteko haurrentzako argazkigintza-ikastaroa TXIKI MENDI KLIK; abenduak 14

• BBK ARETOA:  “El mundo en el fin del mundo” erakusketa, Sebastián Alvaro; abenduaren 14tik 23ra

Tormenta en Skardu-Pakistan por Sebastián Álvaro

Poloniako himalayismoari buruzko mahai-ingurua. Partaideak: Adam Bielecki, Krysztof Wielicki, Denis Urubko, Bernadette McDonald eta Oscar Gogorza; abenduak 17

Denis Urubko alpinista, Mendi Zinemaldiaren II. edizioan

•  EITB-ren multibox aretoa: Zinemari eta argazkigintzari buruzko Master Class-ak; abenduak 14. Hizlariak: Pablo Iraburu, Itziar García eta Jimmy Chin

• BotiKa zaharra: Bilbao Slackline Open 2013;  Abenduak 13, 14 eta 15

• ABOKATUEN ELKARGOA: “Freedom climbers” hitzaldia, Bernadette McDonald; abenduak 16

Escaladores polacos ganándose la vida en las chimeneas de Katowice. Foto cortesía de Krzysztof Wielicki

• Euskalduna jauregia: Terre Magallaniche (1933) filmaren emanaldia, zuzeneko musikarekin; abenduak 18

• BILBOKO ATERPEA: MENDIKLIK III. Mendiko argazkigintza tailerra, Santi Yániz; abenduak 21 eta 22

Mendiko lasterketen entrenamendu eta teknikari buruzko klinika, Rául García Gastán; abenduak 21 eta 22

• Domine HotelA: IAMF Bilbon: Mendiko Zinemaren Nazioarteko Aliantzaren bilera; abenduak 20

• PAGASARRI: Pagasarriko XXIII. martxa, Gran Via 30-etik abiatuta; abenduak 22

Atal zinematografikoaren osagarri, BILBAO MENDI FESTIVAL jaialdiak ekitaldi paraleloen egitarau zabala eta askotarikoa prestatu du. Nabarmentzekoa da, esaterako, nazioarteko maila goreneko alpinistak eta zinemagileak izango direla Bilbon, lehen eskutik kameraren aurrean edo atzean bizitakoak jendaurrean kontatzen.

Agerraldi horien artean, azpimarratzekoa da neguko himalayismoaren eliteko hiru ordezkari bilduko dituen mahai-ingurua: Krysztof Wielicki eta Adam Bielecki poloniarrak eta Denis Urubko kazakhstandarra neguko jarduera horien arriskuez eta bizipenez ariko dira solasaldian. Hirurek ibilbide eta curriculum ikusgarria dute mendian, eta, aldi berean, esperientzia latzak ere bizi izan dituzte, aurtengo martxoan bertan Broad Peakeko neguko espedizioan, edo 2008ko maiatzean, Annapurnan, Iñaki Otxoa de Olza erreskatatzeko ahaleginean, esate baterako.

Jimmy Chin argazkilari estatubatuarra eta Bernadette McDonald idazle kanadarra dira MENDI FILM FESTIVAL jaialdiko aurtengo edizioko beste bi gonbidatu azpimarragarri. Lehenak, argazkigintzarako eta abenturarako pasioa uztartzen ditu, eta mendiko eta eskiko hainbat espedizio gidatu ditu mundu osoan. Berea da jaialdiaren aurtengo edizioko kartelaren irudia, amildegiaren ertzean dagoen eskalatzaile baten argazkia, hotzikara eragiten duen irudia. Aurki izango da ikusgai Bilboko kaleko faroletan, hiriko autobusetan eta tranbian. Gainera, bere argazkien bilduma bat ikusgai dago egunotan Bilboko metroaren hainbat geltokitan. Jimmy Chin bera Master Class bat ematen izango da abenduaren 14an, story teller gisa duen esperientzia azaltzeko.

Bernardette McDonald, bestalde, mendiko literaturaren idazle entzutetsuenetako bat da, eta horren adierazle dira esparru horretan irabazi dituen nazioarteko sari entzutetsuenak. Bera izango da MENDI FILM FESTIVAL jaialdiko nazioarteko epaimahaiaren burua. Horrez gain, muturreko baldintzetan zortzimilakoak igotzeari buruzko mahai-inguruan ere izango da, eta hitzaldi bat emango du “Freedom climbers” bere liburuari buruz. Alpinista poloniarrek Himalayan bizitako epopeiak aztertzen ditu McDonaldek liburu horretan.

BILBAO MENDI FILM FESTIVAL jaialdiaren egitaraua osatzeko, hainbat erakusketa, tailer eta hitzaldi izango dira, Pagasarriko ohiko igoera ahaztu gabe. XXIII. edizioan, Gran Viako BBKren egoitzatik, jaialdiaren egoitza nagusitik, abiatuko da aurten ere mendi martxa. Proiekzio bereziak ere izango dira aurtengo edizioan; esate baterako, Patagoniari buruzko “Terre Magallaniche” 1930eko film italiar historikoa (oraindik orain zaharberritua) proiektatuko dute Euskalduna jauregian, zuzeneko musikarekin gainera. Francesco Pennarolak filmerako propio eginiko musikak girotuko du emanaldia, Pennarolak berak pianoan eta Francesca Villak biolontxeloan interpretatuta.

Kaleko jarduerak ere izango dira jaialdian. Nagusiena, nazioarteko slackline txapelketa (zinta gaineko oreka ariketak), eta horren barnean waterline proba bat itsasadarraren gainean. Highline erakustaldi bat ere egingo da, Bilboko eraikin enblematiko batean altuera handian alderik alde jarritako sokan.

SARRERAK SALGAI DIRA JADA

Gaur, ostirala, jarriko dira salgai MENDI FILM FESTIVAL jaialdiaren VI. edizioko sarrerak, 5 eta 8 euro arteko prezioan eta %20ko beherapenarekin Kutxabank txartelen titularrentzat. Nolanahi ere, aretoen edukieraren %10 gutxienez txarteldegietan bertan salduko da proiekzioaren egun berean.

Proiekzioak izango diren aretoetan bertan, Internet bidez edota BBKren zerbitzu anitzeko kutxazainetan eskuratu daitezke sarrerak:

- Euskalduna Jauregiko, BBK aretoko eta Alhondiga Golem zinemetako txarteldegietan.

-Internet bidez, https://ticket.kutxabank.es/) helbidean, eta Euskalduna Jauregiaren (www.euskalduna.net/) nahiz Alhondiga Golem zinemen web-orrialdean (http://www.golem.es/).

Guztira 22 saio programatu dira jaialdiak iraungo duen 10 egunetarako. Jaialdiaren web-orrialdean (http://www.mendifilmfestival.com/) kontsulta daiteke egitarau osoa. Lehiaketako filmak proiektatuko diren hiru aretoak edukiera handikoak dira: Euskalduna Jauregiko A1 aretoak 613 ikus-entzule har ditzake, eta BBK aretoak eta Alhondiga Golem zinemak, berriz, 432 eta 392 lagun, hurrenez hurren.

Emanaldien atalean, Rekalde aretoak Art of freedom filmaren proiekzio jarraitua emango du abenduaren 10etik 21era, baita bereziki gazteei zuzendutako film laburren sorta bat ere, data berberetan. Emanaldi horietarako sarrera librea eta doanekoa izango da, baina beharrezkoa da aldez aurretik hitzordua lotzea Rekalde aretoko langileekin.