Menditour Arrasate

 Udal aretoan, 790 lagunentzako lekua duena, zazpi film labur eta ertain proiektatuko dira guztira, 7 eta 22 minutu arteko zazpi ikus-entzunezko. Horietatik lau saridun izan ziren MENDI FILM FESTIVAL zinemaldian: epaimahaiaren saria, ikusleena, mendiko film onenarena eta film labur onenarena, hain zuzen. Mendiko eta eskaladako filmez gain, Arrasateko ikus-entzuleek aukera izango dute beste hainbat gairi buruzko lanak eta irudiak ere ikusteko: BTTn edo piraguan bizitako abentura zirraragarriak, mendia eta funanbulismoa uztartzen dituzten highlining jarduera ez sinestekoak…

Iker Pou, hatz bakarreko mugimenduak 3-Dn

Saioaren bizigarri nagusietakoa Nit de Bruixes film laburra izango da. Zazpi minutu ikusgarritan, Iker Pou eskalatzaile gasteiztarrak 9a+ bide batean –kirol eskaladako zailtasun gorena– lortutakoa errenditzen du iruditan ikus-entzunezkoak. Bide hori kateatzen lehena izan da Iker. Zailtasun eta edertasun gorenaren ikurretako bat da Nit de Bruixes, hatz biko eta hatz bakarreko helduleku eta pasartez jositako lerro itzela. Lorpena biribiltzeko, Jordi Canyigueral zinemagile kataluniarrak hiru dimentsiotako iruditan jaso eta ondu du eskalada.

Iker Pou climbs Nit de Bruixes, 9a+ difficulty, in Margalef, Spain on January 24th

 Bost urteko ibilbide laburrean, mendiko zinemaren arloko nazioarteko erreferentzia bihurtu da MENDI FILM FESTIVAL. Zinemaldiaren asmoetako bat, gainera, beti izan da leihoak Euskal Herri osora zabaltzea, lehiaketara aurkeztutako berrogeita hamar film horien lagin esanguratsuena herri batetik bestera eramatea. Hain zuzen, horixe da MENDITOUR ekimenaren funtsa.

 “Nit de Bruixes” bereziaz gain, mendiko zinemako nazioarteko jaialdian lehiatu ziren beste sei titulu eskainiko ditu Menditour Arrasatek, horien artean saritutako lau lan: 

• “Moonwalk” (AEB 2012, 4’), basamortuko paisaia zirraragarrien gainean eginiko highlining ariketa beldurgarria, ilargi bete hanpatua bidelagun. 

Moonwalk; Mikey Schaefer-ek zuzenduta

“Of Souls + Water: The Nomad” (AEB 2012, 7’), Erik Boomerrek,  “National Geographic” aldizkariak urteko abenturazale izendatu zuen gazteak, oinez, eskiz eta kayakez eginiko jardueren laburbilduma bitxia.  Film labur onenaren saria MENDI FILM FESTIVAL jaialdian.

OfSouls+Water: The Nomad; Skip Amstrong

• “Why”(AEB 2011,8’), harkaitz eskalada, piragua eta mendiko bizikleta egiten duten muturreko hiru kirolariren jarduna, eta tartean, betiereko galdera hori: Zergatik?
  

  Why, Corey Rich eta Dane Henryk zuzendutako film laburra

•  “Bajo cero”(Euskal Herria 2012,20’), Gasherbrum I mendirako espedizioan hiru kide desagertu ondoren, Alex Txikon eta Carlos Suárez mendizaleen lekukotza eta hausnarketa sakonak ehuntzen dituen filma.Ikus-entzuleen saria MENDI FILM FESTIVAL zinemaldiaren azken edizioan.
  

  Bajo Cero, Egoi Markaida zinegilearen azken filma

• “Silbergeier”(Frantzia 2012,20’), Suitzako Alpeetako bide tekniko eta gogorrenetako bat eszenatoki, eta txiki-txikitatik hura kateatzeko ametsetan bizi izan den Suitzako bertako neska baten historia.Epaimahaiaren sari berezia MENDI FILM FESTIVAL zinemaldian.
  

  Nina Caprez, Silbergeier filmaren protagonista

Film guztiak jatorrizko bertsioan emango dira, euskarazko azpitituluekin, “Nit de Bruixes” eta “Bajo cero” izan ezik, bi horiek gaztelaniaz.

“Santa Prudentzia taldea" 2009. urtean sortu zen Gasteizen tabernako solasaldi batean. Ideia, berez, oso sinplea da:

• San Prudentzio (Arabako zaindaria)
• Santa Prudentzia (zuhurtasuna, bertute kardinala)
• Kondoia erabiltzea (zuhurtasun-adierazpide bat, eliza katolikoak gaitzesten duena).

 Sortze lan guztiek hiru kontzeptu horiek umorez eta kalitate artistikoz lotzea izan dute helburu. Hortaz, 2009. urtetik, argazkiak, eskulturak, argazki-muntaiak, bideo bat eta hainbat film programatu dira gertaera ospatzeko. Lan horiek Gasteizko lokal publikoetan erakutsi dira apirilaren 28ko egunarekin bat, San Prudentzio egunaren jaia.

 SANTA PRUDENTZIA (V. ESTASIA)

 Santa Prudentzia taldearen Estasiaren V. urtebetetzea da eta bere filosofiari uko egin gabe jarraitzen du. Filosofia horrek San Prudentzio festa bestela ospatzeko asmoa dauka arte-lanak erakutsiz eta lokal publikoetan ekintzak antolatuz.

 Aurreko “Estasietan” ez bezala, aurten alde batera utzi ditugu kondoia eta lan klasikoen erakusketak eta eguneroko garaietara hurbildu gara irudi propio bat sortuz: “Premonizioa edo Probidentzia”.

 PROGRAMA

 - 17:15ean Luis Buñuel zuzendariaren El Ángel Exterminador filmaren emanaldia

- “Santa Prudentzia V, Estasia” izeneko obraren erakusketa:

“Premonizioa edo Probidentzia” eta “Aingeru deuseztatzailea”ri buruzko afixak

–  Proiekzioaren ostean “Santa Prudentzia 2013”deritzanaren making-of-a emango da.

AINGERU DEUSEZTATZAILEA
(México, 1962 – 93 min)
Zuzendaria: Luis Buñuel

Sinopsia: Opera-saio baten ostean Nóbiletarren etxandian afaltzeko gonbita jaso du Mexiko hiriko burges talde batek. Oturuntza amaituta, afaltiarrak etxetik atera ezin direla konturatzen dira, zergatik ez dakitela. Egunak joan egunak etorri eta egoerak bere hartan jarraitzen du. Horrela, mahai-lagunak tratu-adeitasuna alboratu eta bizi sen primitibo eta basatienaz jokatzen hasten dira.

Eszena horietan pertsonaiak, borondatea guztiz galduta dutela, ez dira gauza ez eta etxetik irteteko ere. Ohiturek eta usadioek, gureak ez diren jokabideak ezartzen dizkigutenean, gure askatasun indibiduala mugatzen dute eta ezin gara gu geu izan.  Itxialdiak eta etsipenak biluzik utzi dituzte leizearen suaren aurrean.

Zoriak ez zion Buñueli fedea oparitu. Teologia arloko intolerantzia mota horrek obra aparta osatuko zuen. Apostasia  militantezko eta anarkia estetikozko ideologia gorabeheratsu hori ederki islatuta dago “Aingeru deuseztatzailean”

“Ikusi behar duzuen filma enigmatikoa eta inkoherentea iruditzen bazaizue, gogoratu bizitza bera ere horrelakoa dela.  Errepikakorra da, bizitza bezalakoa, eta bizitza bezala, modu askotan ulertzeko modukoa. Egileak adierazten du sinboloekin jolastea ez dela bere asmoa izan, kontzienteki behintzat. Agian, Aingeru deuseztatzailearen azalpena da, arrazoiaren arabera, ez dagoela azalpenik” (Luis Buñuel)

Bederatzi film labur eta ertain izango dira bi saiotan banatuta, horien artean MENDI FILM FESTIVAL zinemaldiko azken edizioko film onenaren saria, argazki onenarena eta euskarazko film onenarena:

• Bi saioak ordubete eta 45 minutu ingurukoak izango dira, eta 19:30ean hasiko dira; sarrera 5 euro izango da txarteldegian

• Asteartean film onenaren saria proiektatutako da, “Erhard Loretan: Respirer l’odeur du ciel”, Erhard Loretan alpinista suitzarrari eskainitako omenaldia. Hamalau zortzimilakoak igotzen hirugarren gizona izan zen Loretan, eta Alpeetan hil zen, istripuz

• Ostegunean, besteak beste, film hauek proiektatuko dira: “Berriro igo nauzu”, euskarazko film onenaren saria (euskal baserriaren unibertsoari buruzko film ederra) eta “Unicorn Sashimi”, argazki onenaren saria, Japoniako Hokkaido uharteko mendietan eginiko muturreko eskiko jardueren kontakizuna

• Saritutako filmez gain, MENDITOUR DONOSTIAN beste hainbat film ikusgarriz gozatzeko aukera izango da, eta film horien lekuko, baita munduko hainbat zoko-bazter ederresteko ere: Utahko arroilak, Kanadako Helmcken jauzia, Yosemiteko horma bertikalak, Coloradoko Zintzur Handia edota Amazoniako Autana tepuia

Unicorn Shasimi filmaren fotograma, argazki onena MENDI Zinemaldiaren VI. edizioan

Mendiari, abenturari eta muturreko kirolei buruzko azken aldiko zinema onenaren hautaketa ederresteko aukera izango dute aste honetan Donostiako ikus-entzuleek.  Asteartean, apirilak 30, eta ostegunean, maiatzak 2, MENDITOUR DONOSTIA izango da Principal Antzokian. Eta ekimen horren eskutik, donostiarrek nahiz ingurukoek aukera izango dute azkeneko MENDI FILM FESTIVAL zinemaldian lehiatu ziren film onenetako batzuk ikusteko. Iazko abenduan izan zen jaialdiaren bosgarren edizioa, orain arteko arrakastatsuena.

Bost urteko ibilbide laburrean, mendiko zinemaren arloko nazioarteko erreferentzia bihurtu da MENDI FILM FESTIVAL. Zinemaldiaren asmoetako bat, gainera, beti izan da leihoak Euskal Herri osora zabaltzea, lehiaketara aurkeztutako berrogeita hamar film horien lagin esanguratsuena herri batetik bestera eramatea. Hain zuzen, horixe da MENDITOUR ekimenaren funtsa. Donostiako honetan, Principal Antzokia izango da antolatutako bi jardunaldien egoitza. Saio bakoitza ordubete eta 45 minutu ingurukoa izango da, eta 19:30ean hasiko da. Sarrerak 5 euro izango dira txarteldegian.

Hautatutako bederatzi tituluen artean daude MENDI FILM FESTIVAL zinemaldiaren azken edizioko film onenaren saria, argazki onenarena eta euskarazko film onenarena. Aukera paregabea da, beraz, nazioarteko mendiko zinema onena ederresteko.

Hala, asteartean, Mendi zinemaldiko film irabazlea proiektatutako da, “: Respirer l’odeur du ciel”, Erhard Loretan alpinista suitzarrari eskainitako omenaldi hunkigarria. Hamalau zortzimilakoak igotzen hirugarren gizona izan zen Loretan, eta Alpeetan hil zen, istripuz. Iraupen ertaineko filma da, 52 minutukoa, Benoît Aymon suitzarrak zuzendua. Jatorrizko bertsioan emango da, frantsesez, gaztelaniazko azpitituluekin.

Erhard Loretan, Respireur l odeur du ciel filmaren protagonista MENDIko III. edizioan Gasteizen Jabi Baraiazarrarekin solasean

Saioa osatzeko, Alex Honnold eskalatzaileari buruzko film ertaina izango da,  Yosemiteko hiru horma handiak egun bakarrean eskalatzeko erronka laburbiltzen duena. Eta bi film labur ere izango dira: batetik, emakumezko abenturazale baten gogoetak Utahko basamortu eta zintzurretan; eta bestetik Kanadan, British Columbiako Helmcken jauziko izotzetan egindako eskaladaren kontakizuna.

Honnold 3.0 filmaren fotograma

Ostegunean, beste bost film proiektatuko dira, horien artean MENDI FILM FESTIVAL jaialdian saritutako bi film labur: “Berriro igo nauzu”, euskarazko film onenaren saria (euskal baserriaren unibertsoari buruzko film ederra) eta “Unicorn Sashimi”, argazki onenaren saria, Japoniako Hokkaido uharteko mendietan eginiko muturreko eskiko jardueren kontakizuna. Horiez gain, beste film hauek izango dira osteguneko saioan: “Autana”, Amazoniaren bihotzeko Autana tepui galduan eginiko lehen eskaladari buruzko ikus-entzunezkoa, eta bi film labur, “Moonwalk”, highlining edo funambulismo ariketa harrigarria basamortuko paisaian, eta “Last of the Great Unknown”, Coloradoko Zintzur Handian, inon den lekurik miresgarrienean, filmatutako 23 minutu itzel.

Zigoitiko Nomadak zineklubak udaberrirako prestatu duen animazio-zikloaren bigarren filma izango dugu ikusgai larunbat honetan Ondategiko Zigoitia aretoan 20:00etan. Princess izena dauka eta benetan film aparta da, gure zine-areto komertzialetan apenas ikusteko aukerarik izan ez duena.

Ohi kanpoko animazio-film zirraragarri hau, Anders Morgenthaler zinegile eta marrazkilari danimarkarraren lehen lana izan zen formato luzean. Nolanahi ere film hau Araki, The killing of a Japanese Photographer (2003) izeneko film laburrean oinarrituta zegoen, Danish Film School eskolako kurtso amaierako egindako proiektuan alegia, geroan ere Berlingo 2003ko Zinemaldian aurkeztuko zuena.

Araki, The killing of a Japanese Photographer

Zuzendariak berak aitortua denez, film labur bizidun hura, film luzea bera baino gordinagoa, “Tokyo Lucky Hole” liburua eta horren egilea, Nobuyoshi Araki, izan zituen oinarri. Nobuyoshi, egun bizirik dauden argazkilari japoniar nabarmenetako bat da eta meritu handikoa nahiz eta batek baino gehiagok misoginotzat eta pornografotzat jo izan duen presakaegi agian, gaitzetsi nahian edo. “Tokyo Lucky Hole” liburuan, Tokioko artista eztabaidatu eta emankor honek, Japoniako sexuaren industriaren salotasuna dokumentatzen du irudi esplizituak erabiliz. Horretarako, Shinjuku-ko Kabukicho auzoa hartzen du erreferentzia Tokioko 80. urteetako hamarkadan.

Araki Tokyo lucky hole

Berlinen agertu eta hiru urte geroago, Mette Heeno gidoigile daniarrak zehatutako gidoiaz, film labur saritu eta eztabaidatu hartan zirriborratutako ideia Princess filmean gorpuztuko zen. Honek Cannes-eko Zinemaldiaren Zinegileen Hamabostaldian ikusi zuen argia 2006. urtean arrakastaz eta iskanbilaz. Ondoren, Torontora eta Kataluniako Nazioarteko Zinemaldira joan zen eta azken honetan, Sitges-en, Zilarrezko Méliès sari-ikurra eskuratu zuen animazio europar film onenaren kategorian.

Anime klasikoenak ezaugarri dituen bortxakeriara eta sexu-grafismora eramaten gaituzten nortasun-ezaugarriak erabilita, Princess-ek iturri horiek berrerabiltzen ditu eta bisualki oso animazio artistiko erakargarria eta personala eskaintzen digu. Bestetik ere, metrajearen % 20a, flash-back baten haritik, Stine Fischer Christensen aktoresaren benetako irudiek osatuta dago, anime osoa egituratzen duen asmo bengatzailea ekarri duen “causus beli” agerian uzten duena.

Princess ipuina da, August-en eragabeko sumin mendekatzailea kontatzen duen fabula. August, apaiz holandarra, zine pornografikoaren ekoiztetxe baten estoldetara jaisten da mendekua hartzeko asmoz bere arrebaren heriotza eragin zutenak zigortuz. Bere arreba Christina porno-izarra sonatua zen “The Princess” azpizenaz ezagun zena.

Nabarmena bada ere Morgentahlen-ek pornifikazioa kritikatzeko asmoa duela ezin da inolaz ere protagonista eta zuzendaria identifikatzea. Izan ere, zuzendariak behin eta berriz adierazi du ez duela inondik ere filmaren protagonista ankerraren jarrera basatia justifikatu nahi. Princess-en istorioa benetako egintzetan oinarritutako istorio pertsonala da hertsi-hertsian.

Seguruenik, badira beste istorio paralelo batzuk beste norabide batean joan litezkeenak — izan ere pornoaren industria aldaketa sakonak jasaten ari da — baina nolanahi ere zuzendariak istorio hau kontatu nahi izan du eta besterik. Morgentahlen-ek erakutsi nahi izan du pornoaren industriak, orain arte ezagutu dugun bezala behintzat, bizitza asko hondatu dituela alperrik, teknokapitalismoaren zutabeetako bat den aldetik, gure sexualitatearen irudikapen audiobisuala kontrolatuz berak ezarritako genero kodeak erabiliz.
Egia esan, film honen inguruan piztu den eztabaida metafilmikoak, obra honen balio artistikoa eklipsatu du nolabait. Izan ere, film honen intentsitate dramatikoa ez da ohikoa Europan egiten diren animazio-filmetan. Gure latitudeetan animazio-zinemagintza, orohar, adin guztientzako istorio atseginen getoaren babespean gorde ohi baita.

Izan ere, katramilaren gordintasuna gorabehera, Morgenthalen-ek abileziaz eta zalutasun narratibo bikainaz konbinatzen ditu soseguz eta lirismoz beteriko guneak eta indarkeriazko oldargune lazgarri eta zentzugabeak, ez bakarrik alderdi fisiko eta formalean baizik eta, bereziki, alderdi moralean ere.

Bestetik ere, azpimarratzekoa da nola dagoen taiututa Mia-ren pertsonaiaren marrazki psikologikoa. Mia, Princess-en alaba umezurtza da, egoera guztia gehien pairatzen duena. Beste pertsonaiak lauak diren bitartean, Miaren pertsonaiak bilakaera nabarmena erakusten du estatikotasuna hautsiz eta kontraste bizigarria sortuz.

Digresio moralak alde batera utziz, Princess, oso lan berezia da, luzera egokia, erritmo bikaina, estetika koloretsua, sotiltasun teknikoa eta bokazio probokatzailea dituena. Zinezale orok aukera emateko moduko bitxia. Gutxienez ez du inor hotz eta motz utziko.

Bestaldetik, Cameok argitaratu zuen edizio bereziko material osagarrian, lehenago aipatu dugun film laburraz gain (Araki – argazkilari japoniar baten hilketa) Morgenthalen eta Jeppe Severin aktore pornoaren arteko debate argigarria jasota dago, Jeppe vs. Morgenthaler: Pornoaren argi itzalak izenpean non, besteak beste, argiro azaltzen diren zinegile daniarrari axola zaizkion gakoak eta kexkak, esaterako zein arrazoi nagusi dituzten aktoreek zinemagintza pornoan sartzeko.

Basartena 2013 film laburren lehiaketa bidean da berriz ere Urdulizen. Lehiaketan parte hartzeko epea maiatzaren 15ean amaituko da. Aurtengoa VI. edizioa izango da eta hasieran jarritako helburuari eusten zaio ikus-entzunezko lanak sustatuz eta lagunduz.

 Ekimena Basartena Tabernako Patxi Lazkanok abiatu zuen 2008an. Izan ere Lazkano ibilia da iraupen laburreko filmen esparruan, 27 film laburretan eta zenbait iragarkitan parte hartu duela.

Lehiaketan adin guztietako zinemagileek parte har dezakete, DVD formatuan eta gehienez bi lan aurkeztu ahal izango dute, euskaraz zein gaztelaniaz. Lanok ezin izango dute 25 minutuko iraupena gainditu. Arazo teknikoak direla eta proiektatuko ezin izango diren lanak ez dira onartuko.

Dozena bat finalista aukeratuko dira eta uztailaren 27an erakutsiko dira Urdulizeko Kultur Etxean; Plentzia Telebista tokiko telebistan ere ikusiko dira.

Sariei dagokionez, orotara lau izango dira: Fikziozko lan onena, 600 euro eta ikurra; Animaziozko lan onena, 600 euro eta ikurra; Euskal Herriko Zine Eskoletako lan onena, 300 euro eta ikurra; eta, azkenik, Euskaraz eginiko lan onena, 300 euro eta ikurra.

Lehiaketan parte hartzeko xehetasun guztiak www.basartena.com ekimenaren webgunean biltzen dira.

MENDI FILM FESTIVAL, mendi, abentura eta muturreko kirolen euskal zinemaldiak, pasa den abenduan bosgarren edizioa osatu berri duen honetan, Bartzelonako IV. BCN Sports Film jaialdian hartuko du parte apirilaren 18tik 20ra. Kirolei buruzko film eta dokumentalen jaialdia da Bartzelonakoa. Barcelona Olímpica Fundazioak, Fédération Internationale Cinéma Télévision Sportifs (FICTS) erakundeak eta Nikita Distribution banaketa-enpresek antolatzen dute ekitaldia, Bartzelonako Udalaren, Espainiako Batzorde Olinpikoaren eta Bartzelonako Hiri Garraioak entitatearen babesarekin.

Zehazki, MENDI FILM FESTIVAL zinemaldiak “One to One” ekimenean hartuko du parte. Topagune horren funtsa da kiroletako ikus-entzunezkoen ekoizle eta egileak eta estatuko nahiz nazioarteko emisio-kanal, jaialdi tematiko eta banaketa-enpresetako ordezkariak aurrez aurre elkartzea. Jada ekoitzitako kiroletako ikus-entzunezko sormen-lanak sustatzeko eta banatzeko aholku praktikoak ematea da, hain zuzen, networking-eko ekitaldi horren xedea.

MENDI FILM FESTIVAL zinemaldiaren azkeneko edizioan saritutako lau film proiektatuko dira Kataluniako jaialdian. Honako hauek, hain zuzen: “Pura vida” (mendiko film onenaren saria); “Origins: Obe and Ashima” (mendiko kirolen film onena); “Of soul + water: The nomad” (film labur onena); eta “Unicorn Sashimi” (argazki onena).

Saritutako filmez gain, BCN Sports Film jaialdian izango dira Euskal Herriko mendi zinemaldi entzutetsuan estreinatu zen “Next Stop Greenland” ikus-entzunezkoa eta beste bi lan: “Of soul + water: The warrior” eta “Why”.

Obe and Ashima filmak, mendiko kirol film onenaren saria eskuratu zuen MENDI zinemaldiaren azken edizioan

Jardunaldian, besteak beste, zenbait oinarri teoriko eta teknikoren berri eman zen: Zer da eta nola dabil zootropo bat? edo, nola lortu daiteke mugimendu-sentipena argazki-kamara bat, personaje-sorta bat eta atzeko irudi finko bat erabilita? Munduko elementalenik elementalena, ene Watson maitea.

Gainera, Soniak istorio asko ezagutzen dituenez eta animazioaren egitekoetan eskarmentu handia duenez egoera baliatu zuen parte-hartzaileei azaltzeko nola egokitu daitezkeen stop-motion hizkuntzara gure betiko ipuinak.

Eta teroriatik praktikara berehala egin zuten salto. Bertan, gure biblioteka txikian zootropo eder bat zegoen, aspaldiko animalia bitxia bailitzan (Nomadak zineklubeko lagunek utzita); horrekin batera eszenatoki bat eta argi batzuk jarri zituzten. Lantaldea berehala jarri zen lanean: zernolako istorioa asmatu nahi zuten erabaki beharra zegoen; istorio horren pertsonaiak asmatu behar zituzten; eta horiek eszenatokian kokatu, mugitu, argazkia egin, iluntasunetik atera eta “animatu”, alegia “bizitza eman” bizitza ez duenari.

Bitartean, bibliotekaren beste txoko batean, beste begi pare batek adi-adi jarraitzen zuen prozesu guztiaren bilakaera. Aldiro begiak kliskatzen zituen eta betazalaren mugimendu bakoitzarekin bertan gertatzen zen guztia erasota uzten zuen.

Hona datorrena horren lekuko adierazgarria da:

(Txanogorritxu gixajoa! Zigoitiko neska-mutikoek ondo baino hobeto jaso dute gure inozentzia hurbil-hurbil dugun hondamendiaren aurrean)

Ikus dezakezuenez, tailerra, Zigoitiko Liburutegiaren I. Jardunaldietarako programatutako ekintzen barruan bideratuta, interesgarria izan zen oso. Orain gehixeago ulertzen dugu. Gehixeago magiari buruz, gehixeago magiaren trikimailuei buruz eta trikimailurik ez duen magiari buruz. Mila esker Sonia. Atsegin handia izan zen.

Javi Arbulu Agirre

Argazkia: Living with vulcanoes Fulvio Mariani-rena

Mendi, abentura eta muturreko kirolei buruzko zinemaren euskal jaialdiak seigarren edizioa izango du aurten, Bilbon, abenduaren 13tik 22ra, eta lehiaketako lanak jasotzeko epea zabalik izango da irailaren 30era arte.

MENDI FILM FESTIVAL, mendi, abentura eta muturreko kirolei buruzko euskal zinemaldiak, zabalik du jada seigarren edizioan lehiatuko diren filmen izena emateko epea. Gaurtik irailaren 30era, mendiarekin lotura duten ikus-entzunezko mota guztiak bidal daitezke Mendi zinemaldira.

Kontakizuna mendian garatzea edo edukiak mendiarekin zerikusia izatea da filmek bete beharreko baldintza. Gaiak, beraz, askotarikoak izan daitezke: alpinismoa, eskalada, mendiko eta abenturako kirolak, eskia, muturreko kirolak, ingurumena, etnografia, etab. 2011ko urtarrilaren 1etik aurrera egindako ekoizpenek soilik izango dute lehiaketara aurkezteko aukera. Jaialdiko Hautaketa Batzordeak aztertuko ditu bidalitako lan guztiak.

Izena emateko eta dokumentazioa bidaltzeko, helbide elektroniko hau egokitu du antolakuntzak: info@mendifilmfestival.com

Oinarriak web-orrian: www.mendifilfestival.com

Zigoitiko Nomadak zineklubak hiru filmek osatutako zikloa prestatu du udaberriari merezi bezala eta kolorez harrera emateko. Oraingoan animazioari begiratu diote eta oso mota ezberdineko lanak aukeratu dituzte.

 Animazio-ziklo hau larunbat honetan, apirilaren 6an, hasiko da 20:00etan, ohi bezala, Zigoitia aretoan (Ondategi). Egun horretan Fernando Trueba, Javier Mariscal eta Tono Errandoren artean prestaturiko Chico eta Rita izeneko filma proiektatuko da, Europar Zinearen Sarien 24. edizioan animaziozko film onenaren saria eskuratu zuena.

 Berrogeigarren urteen amaierako Kuban, maitasun historia kartsua hasiko dute Chicok eta Ritak. Jazzarekin maitemindurik dagoen piano-jotzaile gaztea da Chico eta Ritak, berriz, abeslari handia izan nahi du. Habanako klub batean dantzaldi batean halabeharrak elkartu zituen gau hartatik, elkartzen eta elkarrengandik urruntzen ditu bizitzak, bolero bateko pertsonaien antzera.

 Fernando Trueba da zuzendaria, 1993. urtean Belle epoque filmarengatik atzerriko hizkuntzan egindako film hoberenaren Oscarraren irabazlea, aspaldi ez dela Artista eta modeloa (2012) estreinatu duena. Film honetan aldiz Truebak Bebo Valdés musikaria oroitu nahi izan du. 

 Javier Mariscal da zuzendarikidea, artista eta diseinatzailea, Bartzelona 92ko Joko Olinpikoetan "Cobi" maskota ofizial aukeratu zutenean egin zen ezagun. Tono Errando ere zuzendarikidea da, Mariscalen anaia txikia, eta bideoklip musikalen (Radio Futura, Los Rodríguez, Duncan Dhu, Luz Casal, Compay Segundo,La Oreja de Van Gogh) eta Telebistako iragarkien zuzendari lanetan denboraldi bat eman ondoren, 1998. urtean Estudio Mariscal estudioan hasi zen animazio zuzendari gisa.

Zera dio Truebak: "Niretzat, abestia da Chico & Rita, abesti erromantikoa, boleroa. Abeslari baten eta piano-jotzaile baten istorioa da, Kuban, berrogeigarren urteen amaieran, eta bizitzak nola elkartzen eta nola elkarrengandik urruntzen dituen kontatzen du abesti batean bezala. Musika, maitasun, sentsualitate eta kolorez betetako filma da".

Trueba bat dator Bebo Valdes goapo eta gaztearen argazkiek Mariscali Chicoren kontzeptualizazio fisikorako inspirazio gisa balio izan ziotela esatean, pertsonaia ez dagoela musikarian oinarritua esaten badu ere.

 Bestetik, ziklorari jarraiki, apirilaren 27an aldiz oso film ezezaguna eta interesgarria ikusteko aukera egongo da, Anders Morgenthaler-ek zuzendutako Princess izeneko filma, hain zuzen.

 Zikloa maiatzak 18an amaituko da Ignacio Ferreras-en Arrugas-en proiekzioarekin. Arrugas bi dimentsioko animaziozko film luzea da, helduentzat pentsatua eta Paco Rocaren (2008ko Espainiako Komikigintza sariaren irabazlea) izen bereko komikia oinarri duena.

Zuzendaria larri zegoen asteazkenetik Malagako Pascual klinikan “ictus” batek jota.

Jesús Franco Manera, Jess Franco izenaz ezaguna, hil berri da Malagan “ictus” baten ondorioz 82 urte zituela, bere azken filma 'Al Pereira vs. the Alligator Women' estreinatu berria zela. Hortaz, talentu handiko zuzendari ezkonformistak bete-betean eutsi dio emandako hitzari (kamara lepoan hilko naiz).

Jess Franco, zine-zuzendaria, gidoilaria, aktorea, konpositorea, ekoizlea eta muntatzailea, 1930eko maiatzaren 12an jaio zen Madrilen. Bere burua zinegiletzat baino jazz-musikaritzat jotzen bazuen ere (tronpetarekin ez zen makala) bere ekarpena Espainiako zinemagintzara funtsezkoa izan da, eta Espainiako B seriearen eta zine fantastikoaren aitzindaritzat jo dezakegu.

Bardem eta Berlangaren laguntzaile, Fernando Fernán Gómezen lagun gautxori sartu-irtenetan eta Orson Welles-en euskarri ezinbestekoa izan zen Espainian filmatutako pelikuletan: ‘Falstaff - Chimes at Midnight’ eta ‘Altxorraren uhartea’ ezezaguna.

Bere filmografiak 200 film baino gehiago hartzen ditu baitan, bereziki, beldurra, erotismoa, pornografia, zientzia fikzioa eta abenturak gai nagusi dituela. Horien artean, besteak beste, honako hauek nabarmendu genitzake: “La reina de Tabarín” (1960), “La muerte silba un blúes” (1962), “Rififí en la ciudad” (1963), “Golden Hort”, “Residencia para espías” (1966), “Bésame, monstruo” (1967), eta “El castillo de Fu-Manchú” eta “Sumuru”, bi hauek 1968. urtekoak.

Bestetik ere, frankismoaren garaiko zentsuraren ondorioz atzerrian zuzendu behar izan zituen hainbat pelikula, esaterako Frantzian , Britaina Handian , Italian , Suitzan, Holandan Luxemburgon edo Alemaniako Errepublika Federalean.

2009. urtean Espainiako Zine Akademiak Ohorezko Goya eman zion bere filmografia luze, emankor eta anitza sarituz eta zinemagintzari eskainitako dedikazio erabatekoa eskertu nahian.

Tamalez, El caso de la guiri asustada (Ikaratutako atzerritarraren kasua) izeneko proiektua bertan behera geratu beharko bada da ere klaketa.net–en harro gaude crowfunding bidez bultzatutako koprodukzio hartan parte hartu izanagatik, zine independentea aurrera eramateko bide horretan erabat sinistuta baikaude.

Zaudenean zaudela Jess, mila esker zure ausardia eta zinemari ekarritako orijinaltasunagatik.