“Los monstruos no existen” film laburra Gasteizen
Paul Urjiko zinegile gasteiztarraren ibilaldia ez da makala izan azken boladan, ez alajaina. Izan ere, aurreko film laburrarekin Jugando con la muerte (Herioarekin jolasean) 23 sari eskuratu ditu eta 150 aldiz baino gehiago hautatu dute mundu osoko zinemalditan. Oraingoan, Gasteiza itzultzen da bere azken lana erakusteko Los monstruos no existen (Mamuak ez dira existitzen) izenekoa.
Filma ostegun honetan, maiatzak 17, proiektatuko da 19:30etan Guridi zinemetan.
Los monstruos no existen, pasa den hilean ikusi zen lehen aldiz Donostiako Giza Eskubideen X. Zinemaldian eta bertan film labur onenaren saria lortu zuen, gazteen epaimahaiak emanda.
Beraz mundu zabaleko zinemaldietatik ibiltzen hasi aurretik etxekook aukera izango dugu Paul Urjikorekin berarekin solasean aritzeko eta filmaz gozatzeko.
Zuzendaria, Paul Urkijo, aktoreekin filmaketa bitartean
Dokumental kutsuko fikzio eta fantasiazko lan hau Camboyan (Phnom Penh) filmatu zen 2011ko urrian eta bertan herri honetan nagusi den miseriaren ondorioz umeak mehatxatzen dituzten arriskuak islatzen dira. Zehazki esateko, horrelako egoeretan ugari diren eta umeen xalotasunaz baliatzen duten "mamu"ei buruzko gogoeta egiten du zuzendari arabarrak.
10 minutuko film labur hau, mundu osoan umeek pairatzen dituzten abusuak ikertzea eta salatzea helburu duen PROTECT elkarteak ekoiztu du Paul Urkijo bera eta Christian Gálvez-en 47 Ronin ekoizpen-etxearekin batera.
Basartena film laburren lehiaketaren V. ediziorako deialdia
Basartena 2012 film laburren lehiaketa jarri dute martxan berriz Urdulizen. Ekimena Basartena Tabernako Patxi Lazkanok gidatzen du, izan ere, Lazkanok ibilbide luzea egin du iraupen laburreko filmen esparruan.
Lehiaketan parte hartzeko epea maiatzaren 31n amaituko da. Aurtengoa V. edizioa izango da eta iazko formatuari jarraituko zaio.
Kostu handiko ikus-entzunezko lan hauek sustatu eta laguntzekoa plataforma eratzea izan da ekimenaren xede nagusia.
Lehiaketan adin guztietako zinemagileek parte har dezakete, DVD formatuan eta gehienez bi lan aurkeztu ahal izango dute, euskaraz zein gaztelaniaz. Lanok ezin izango dute 25 minutuko iraupena gainditu. Arazo teknikoak direla eta proiektatuko ezin izango diren lanak ez dira onartuko.
Dozena bat finalista aukeratuko dira eta uztailaren 28an erakutsiko dira Urdulizeko Kultur Etxean eta Bilboko Abokatuen Elkargoan; inguruko jendeak ere aukera izango du filmak ikusteko Plentzia Telebista tokiko telebistan.
Epaimahaiak amaierako saioan, uztailaren 28an, emango du bere epaia.
Sariei dagokionez, orotara lau izango dira: Fikziozko lan onena, 600 euro eta ikurra; Animaziozko lan onena, 600 euro eta ikurra; Euskal Herriko Zine Eskoletako lan onena, 300 euro eta ikurra; eta, azkenik, Euskaraz eginiko lan onena, 300 euro eta ikurra.
Lehiaketan parte hartzeko xehetasun guztiak Basartena 2011 ekimenaren webgunean biltzen dira.
San Prudentzio Everesten egon zenekoa
Alberto Zerain San Prudentzioaren irudiarekin Everesteko gailurrean 1993ko maiatzaren 16an
Pasa den abenduan burututako Nazioarteko 4. Mendi Zinemaldiaren barruan, KREAk eta Mendi Film Festival-ek mendiko bideo-produkzio tailerra antolatu zuten, Jordi Canyigueral eta Pau Savall-en gidaritzapean. Tailerrak mendiko eta eskaladako bideoak egiteko oinarrizko eta aurreratutako ezagutzak eta gakoak eskaintzea zituen helburu eta, bertan, mendi eta eskaladako bideoen grabazio- eta postprodukzio-tekniken ikaskuntza eta hobekuntza jorratu zen profesional mailan.
Egia esateko, tailerrak harrera ezinhobea izan zuen eta, tamalez, hainbat interesdun tailerretik kanpo geratu ziren. Zorionez antolakuntzak agindu duenez antzeko tailer gehiago egiteko asmoa dago urtean zehar ahalik eta jende gehienari aukera emateko.
Oraingoan, arabarrok San Prudentzio jaiak ospatzekotan gaudela aitzakitzat hartuz tailerrean zehar burututako lanetako bat dakarkizuet. Izan ere bideo horretan Alberto Zerain mendizala arabarrak aspaldiko anekdota bat ekartzen digu gogora, alegia, nola eraman zuen San Prudentzioren irudia Everesteko gailurrera lehen espedizio arabarrak (93-05-16).
Tira ba, erlijio kontuak alde batera utziz horra hor anekdota tailerreko ikasleek gauzatutako bideo txukun honetan. Por zierto, ikusi nahi duenarentzat Oroko santutegian dago arabarron patroiaren iruditxo hori.
“Afvist” film laburra “Zubiak” lehiaketan irabazle
Afvist film laburra izan da Getxoko Zubiak film laburren lehiaketaren aurreneko edizioko irabazlea. Danimarkatik etorritako dokumentalarekin batera, La hégira film espainiarra eta Uwe+Uwe alemaniarra izan dira gainerako bi sariak eskuratu dituztenak Getxoko Udalak antolatzen duen Aniztasunaren aldeko eta Arrazakeriaren kontrako Laburmetrai Lehiaketa honetan.
Zubiak lehiaketaren lehenengo edizio honetan 90 lan aurkeztu eta 21 film hautatu ziren lehiatzeko. Finalistak Algortako Villamonte kultur gelan erakutsi ziren martxoaren 27 eta 28an . Inmigrazioarekin eta arrazakeriaren aurkako borrokarekin lotutako pertsonek -Getxoko Etorkinak Plataforma, SOS Racismo Bizkaia, CEAR Euskadi -, zine eta sormenarekin zerikusia duten adituek eta Getxo Zineklubeko ordezkariek osatutako epaimahaiak lan onenak zein ziren erabaki eta martxoaren 30an ostiralean eman zituen sariak Areetako Andrés Isasi musika –eskolan.
Esan bezala, lehen saria Aage Rais-Nordentoft zuzendari danimarkarrak zuzendutako Afvist-Denied filmarentzat izan zen. 2009. urtean Copenhagueko Brorson elizan babes bila elkartutako 80 errekuxiatu irakiar kaleratu zituen poliziak. Gertakizun horien berri ematen digu filmak. Amaiera-saioan zuzendariak mezu bat bidali zuen saria eskertuz eta bere poza agertuz film honen helburua istorio honen berri ematea eta kaleratzearen ondorioak erakustea baizen.
Denied (english version) from AFVIST on Vimeo.
Bestalde, bigarren saridunak, Liteo Delirok zeutiarrak zuzendutako La Hégira filmak, bi nerabe musulmanen arteko amodio istorioa eta horietariko batek bizitza hobeagoaren bila joateko alde egiten duela kontatzen du.
Era beran, Lena Libertak zuzendutako Uwe+Uwe hirugarren sarituak kamioi-gidari alemaniar baten errefuxiatu afrikarren familia batekiko jarrera aldaketa uzten du agerian, hasieran beraiengatik alde egiten saiatzen delako eta amaieran onartzen eta beraiekin bizitza antolatzen amaitzen duelako.
Gainera, Zubiak lehiaketak bi aipamen berezi eman zituen. Bata Maysun Cheick Aliren Mon Amour-Hormen istorioak lanarentzat. Film honek erakusten digu egun, familiak, kulturak eta herriak banatzen dituzten oztopoz inguraturik dagoela mundua. Filmak oztopo horiek aztertu eta berauen desagertzea aurreikusten du.
Beste aipamen berezia Felipe del Olmo eta Daniel Valledok zuzendutako Ngutu filmarentzat izan zen. Apenas salmentarik daukan egunkari ibiltari saltzaile da Ngutu. Oso haserreturik, oinezkoak aditasun handiz behatzen arituko da bere negozioan gora egiteko.
Azkenik, herritarrek aukeratutako film laburra New Zelandeko Welby Ingsen Munted izan zen.
Zozoaren ametsa
"Hort del Foret" hiri-baratza Bartzelonako Raval auzoan
Gaurkoan El sueño del mirlo (Zozoaren ametsa) izeneko dokumentala aurkeztu nahi dugu gure hirietan naturatik gero eta urrunago dagoen giroan argi-izpi bat irekitzen duelakoan. Apala forman baino oso film labur txukuna edukinei dagokienez, ekimen publikotik sortu da eta Creative Commons lizentziaz zabaltzen ari da.
15 minutuko film labur honek Bartzelona Raval auzoan dauden bi hiri-orturen istorioaren berri ematen digu. “L'Hortet Del Forat” eta “L’ Hort del Xino” hiri erraldoiaren erdigunean xirmi-xarmaz edo sortutako bi naturgune txiki dira. Porlanezko hormen artean sortutako oasis xarmangarri hauek auzokideek berek kudeatzen dute elkarlanean eta ingurumen garrantziaz jabetzeko gordeleku bilakatu dituzte. Ortuon begiraleek leku horien nondik norakoa kontatzen digute eta jendeak proiektu eta ekintza ezberdinetan nola parte hartzen duen azaltzen digute.
Baratzak ezagutzen ditugun bitartean, zozo bat, azenarioko antzoki txikiko adiskideekin batera bidaian irteten da hiri handian naturaren izpiritua gordetzen duen azken txokoaren bila.
Filma Klaus Jack-ek egin zuen Bartzelonako Pati Limona gizarte-etxean 2012. urtean emandako Dokumental Sozialeko ikastaroan.
El sueño del mirlo from Klaus Jack on Vimeo.
“Portrait” film laburra arratsalde honetan lehen aldiz Montehermoso-n
Azken asteetan 14 eta 25 urte bitarteko hainbat gazte ikusi izan ditugu Gasteizko kaleetatik kamera eta tramankuluz inguratuta filmaketan. Herrialde eta arraza ezberdineko neska-mutiko horiek Portrait, Vitoria-Gasteizko gazteen erretratua izeneko film labur dokumentala prestatzen ari ziren.
20 minutuko dokumental honen helburua da etorkizunari begira Gasteizen bizi diren hainbat gazteren esperientziak, ametsak eta itxaropenak islatzea. Film honetan gazteok lan-itxaropenei buruz mintzatzen dira Gasteizko industrialdeetatik, kultura eta pertsonen arteko harremaneei buruz Zabalgunetik; bai eta etorkizun-itxaropen, amets eta ilusioei buruz ere hiri erdigunetik.
Film labur honek agerian uzten ditu filmaketan parte hartu duten 41 gazteen arteko antzekotasunak. Izan ere, nondik datozen aldera batera utzita, denok dute antzeko itxaropenak: lan egin, bidaiatu, erronkei aurre egin, esperientzia berriak izan…..
Azkenean hilabeteetan zehar jorratutako lana begibistaratzeko unea heldu da, estreinaldia gaur, martxoaren 23an, izango baita Montehermoso kulturgunean (Ortuño aretoa) saio bikoitzean. Lehenengo emanaldia 19:00etan izango da eta ordu erdi geroago berriz ere proiektatuko da.
Film labur honen ekimena Gasteizko Udaleko Gazteria Unitateak sustatu, Norabidek antolatu eta Vitoria-Gasteiz Film Officek burutu du.
Emanaldien ostean, 20:00etan, kontzertu bat izango da Klaustroan, bertan dokumentalean lagundu duten musikariek parte hartuko dutela.
Sarrera dohainik da.
“Herioarekin jolasean” eta “Un dios que ya no ampara” Sarean ikusgai
JUGANDO CON LA MUERTE (Herioarekin jolasean), Paul Urkijo zinegile gasteiztarrak egindako film labur arrakastatsua (23 sari jaso ditu dagoeneko) ikusgai dugu berriz ere Interneten FIBABC (Festival Iberoamericano de Cortometrajes ABC) zinemaldian lehiatzeko hautatua izan baita.
Abagune paregabea beraz oraingoz ikusteko aukerarik izan ez duzuenontzat. Gainera botoa ematea ere izango duzue irabazlea aukeratzeko.
Paul Urquijoren film laburrarekin batera, beste euskaldun baten film laburra hautatu dute FIBABC-ekoek, alegia, Gaizka Urresti bilbotarraren Un dios que ya no ampara (Dagoeneko babesik ematen ez duen jainkoa) izeneko dokumentala. Miguel Mena idazlearen kontakizunetan oinarritutako film honek “Mezu garrantzitsuaren Saria” eskuratu berri du Lenolan (Italia) "Inventa un Film-Lenolafilmfestival" zinemaldiaren 14. edizioan.
Un dios que ya no ampara bizi-larriminari buruzko istorioa da. Duela urte batzuk, bere lehenengo seme-alaba baten zain zegoela, Miguel Mena idazleak eta kazetariak promesa bat egin zuen; dena ondo joanez gero Moncayo mendira igoko zen. Igo eta hilabete batzutara Angelman sindromea antzemango zioten Daniel bere semeari, buru atzeratasuna dakarren malformazio genetiko larria. Zenbait urte geroago, destinoari korromioa gainditutakoan, Zaragozako etxetik mendi magikora itzultzea erabakiko zuen Miguelek buruz buruko bat izateko asmoz.
Labur esanda, semearen ahalmen urritasunari erantzunen bila bidaian abiatutako aita baten istorio hungarria.
“Eulien trena” film laburra Artiumen ikusgai
Ostegun honetan, abenduaren 15ean, aukera izango dugu El tren de las moscas (Eulien trena) film labur dokumentala ikusteko Gasteizko Artiumeko Mintegia aretoan 19:30tan dohaneko sarrerarekin.
Fernando López Castillo zinegile gasteiztarra, dokumentalaren zuzendarietako bat (bestea Nieves Prieto Tassier katalandarra dugu), Artiumen izango da filma aurkezteko eta ikusentzuleekin solasean aritzeko.
Film honek urtero Mexikotik Estatu Batuetara pasatzen saiatzen diren 400.000 emigranteen tragediaren berri ematen digu. Eulien moduan bidaiatzen dute, zama-trenen gainean: ilegal hauentzako ez dago hegaldirik, ez eta gerorik ere… Hamarretik sei neskato edo emakume bortxatuak dira bidaian zehar; 10.000 inmigrante inguru Mexikoko talde kriminalek bahituak izaten dira urtero, eta milaka erbesteratuak.
Veracruz herrian, aldiz, itxaropen txiki bat topatzen dute; “ugazabandreak”. Emakume kementsu hauek trenbide ertzean jarri eta jan-edanak ematen dizkiete trena bertatik pasatzen denean. Eta horrela, egunero, 15 urtetan…
Dokumental labur honek arrakastaz beteriko ibilbidea egin du film laburren zinemaldietan zehar (Gasteiz, Huesca, Murtzia, Madrid, Palentzia, Donostia, Paris eta Txinako Shezen-en), eta hainbat sari jaso ditu dagoeneko, besteak beste, Lizarran (lehen saria), Rondan (lehen saria), Benaventen (publikoaren saria) eta Pasaian (Bekoz Beko saria).
Argibide gehiago web-orri ofizialean: "El tren de las moscas".
34. Euskal Zine Bilera 2011
Azaroaren 28an hasita eta abenduaren 3ra bitartean euskarazko film laburrak protagonista dira Lekeitioko Euskal Zine Bileraren 34. edizioan. Aurten, gainera, euskaraz egindako ikus-entzunezkoen sektorea sustatzea helburu duen euskal zine bilerak, pasa den apirilean zendu zitzaigun Aitzol Aramaio zinegile gaztea omenduko du.
Lekeitioko Euskal Zine eta Bideo Bilerak ezaugarri nagusia du euskaraz egindako film laburrei berariaz eskainita izatea. Lehiaketak bi kategoria dauzka, bata profesionalentzat eta bestea amateurrentzat.
Aurten, 31 lan hautatu dira guztira lehiaketa arloan: 16 film, profesionalen atalean (Odola, Johnny Kurutxet. Sustraiak Han Dituena, Zauriak, Garaipena, Pagoarte9707, Artalde, Ondar Ahoak, Arditan, Carpe Diem?, Eta amama?, Urrezko eraztuna, Barkatu, Malkoa, Moldatu, Leon apaizaren eskarmentua y Artista) eta beste 15 film amateurren sekzioan (Zauriak, Txiri-Txiri Pitxin, Edo..., Eraldaketa, Stop&Go, Artoaren ohiartzuna, Aita Antza!!!, Otsoaren Hatsa, OAB-BB, elkartasun katea, Berandu, 0,39, Ene baitan, Koloreak, Genaro, gizon arrunta, Kresalezko sentimentuak eta Biak Bat).
Amaiera-fasean dauden filmak Lekeitioko Ikusgarri zine-aretoan proiektatzen ari dira, 19:30etan, azaroaren 29tik abenduaren 2ra arte.
Bilera pasa den astelehenean hilak 28 ireki zen Ttaup, Ttaup! Arraun Kolpeka eta Emakumeak Plazan lanen proiekzioarekin lehiaketaz kanpo. Abenduaren 3an, Iban del Campo errealizadoreak eta Usoa Fullaondo ta Olaia Mirandal Arte Ederretako irakasleek osatutako epaimahaiak ebatzitako sariak banatuko dira Ikusgarri zine-aretoan.
Zilarrezko eta brontzezko sari bana emango dira dokumental, argumentuzko eta sormenezko modalitateetan. Profesionalentzako kategorian sariok 1.600 eta 1.100 eurokoak dira, hurrenez hurren; eta amateurren kategorian 1.200 eta 800 eurokoak.
Epaimahaiak sei irabazleen artean bat aukeratuko du bilerako filmik onena. Sari horren irabazleari garaikur berezia emango zaio,Urrezko Antzarra. Honek ez du diru-saririk izango.
Amaierako ekitaldian, Topagunearekin (Euskara Elkarteen Federazioa) elkar lanean sortutako Benito Ansola bekaren babespeko bi lan proiektatuko dira, iazko irabazleen lanak hain zuzen, aurrekontu-murrizketak direla-eta bekok bi urtetan behin ematekoak baitira. Horren ostean proiektatuko da euskal emigranteen amonari egindako elkarrizketa bat, 2010ean Estatu Batuetan hil zena 105 urte zituela. Eta amaitzeko Aitzol Aramaio zenaren Terminal film laburra emango da, zinegile ondarrutarraren lagun zen Kirmen Uribe idazlea bertan egongo dela.
Programa osoa: www.zinebilera.com
Irungo Gazte Zinema eta Bideoaren XIV. Lehiaketarako hautatutako film laburrak
Irungo Udalak jakinarazi du zein izan diren Irungo Gazte Zinema eta Bideoaren XIV. Lehiaketan parte hartzeko hautatutako filmak. Lehiaketa Amaia Kultur Zentroan egingo da, datorren abenduaren 26tik 29ra bitartean.
XVI. edizio honetan, estatuko nahiz nazioarteko zinegile gazteen film labur hautatuak Iruna ekartzea izan da lehiaketaren asmoa.
Sail Ofizialak bi maila izango ditu berriz ere: bideoan egindako film laburrak eta zinean egindako film laburrak.
Bideo-kategorian honako lan hauek izango dira lehian:
- Moldatu
- Jugando con la muerte
- En la próxima parada
- ¿Por qué desaparecieron los dinosaurios?
- Bucle
- Posturas
- Mi lucha
- Anima
- Zapping life
- Algo queda
- 3,2 lo que hace las novias
Zine-kategorian, aitzitik, honako hauexek izan dira hautatuak:
- Dicen
- Reflexiones de un picaporte
- She’s lost control
- El coito nubla la vista
- Dulce
- La cuerda
- Lagun Mina
- Lone-illness
- El barco pirata
Gainera, Lehiaketak berriz ere "Labur+" eta "Bidasoako eskualdea" sekzioak izango ditu. Lehenengoan, Sail Ofizialean sartu ez baina ikusleentzat interesgarri irizten diren film laburrak hautatzen dira. Bigarrenean, eskualdeko errealizadoreek egindako lan nabarmenduen hautaketa bat da. Aurten honakook izango ditugu ikusgai: Un año y un día, Estereoscopia, La tragedia del hombre hueco eta Gartzela bideo-arloan; eta Eso te pasa por barroco, Lines, Turno de noche eta La huída, zine-atalean.
Epaimahai ofizialaz gainera, Epaimahai Gazte bat izango du Lehiaketak, 18 eta 35 urte bitarteko gazteez osatua, eta horiek aukeratuko dute "Labur+" saileko irabazlea.
Proiekzioak 19:00etan hasiko dira eta sarrera dohainik izango da.
Hizkuntzak/Idiomas
Albisteak
Nomadak zinekluba
Atalak
Azken sarrerak
- MENDI Zinemaldiko 3-D filmak Arrasaten ikusgai
- Santa Prudentzia Abisinia kafetegian
- MENDI Zinemaldiko film onenak Donostian
- “Princess”, Nomadak zineklubean
- Ireki da Basartena film laburren lehiaketarako deialdia
Artxiboak
Esteka interesgarriak
- 39 escalones
- Cahiers du cinema
- Cine con jazz
- Contrapicado
- Notas de cine
- Otro cine
- Otros clásicos
- Pasión silente
- perroferozamarillo
- Un mundo desde el abismo
Euskarazko orriak
- Azpitituluak euskeraz
- Filmazpit
- HausnaUrtu
- Iruditxokoa
- Kulturklik
- Tinko euskara elkartea
- Wilderrek egingo lukeen bezala
Zine-banatzaileak
Zineklubak
- b-cramps
- Bergarako Gaztetxeko Zinekluba
- Cine forum Herrikoi
- Cineclub FAS
- Goieniz zinekluba
- Okendo zinema-taldea
- Zine Klub Butak 21
- Zineklub Gernika
