“Ensayo de una revolución”
Maiatzaren 15ekoaren lehen urteurrena dela-eta Banatufilmak ekoizpen-etxekoek Pedro Sarak zuzendutako "Ensayo de una revolución" izeneko dokumentalaren trailerra utzi digute.
Cadiz-en gaude, 2011. urtean. Maiatzak 15 egin ditu eta izen gabeko aurpegiek eta ahotsek herriko kale eta plazak hartu dituzte euren gaitzidura adierazteko, elkartzeko eta alternatiba paketsuak eraikitzen hasteko. Pentsamendutik ekintzara salto egin eta benetako aldaketak lortzen dituzten andra-gizonak eta neska-mutilak ditugu. Iraultza orokorraren tokiko adibide bat, Spanish Revolution deritzona.
DENOK BATERA
"Pertsona bat hiltzen den bakoitzean
denok ari gara hiltzen pixka bana
arriskuaren aurrean harrotu eta
bere goi matxinadekin espasmo artean betiereko udaberria
berriz osatzen duen bihotz akuilagarriaren danbada baigina.
Andana gara. Itxaropenaren batasuna osatzen dugu,
Eta jakitun gara. Eta jakitun izateak sendotu egiten gaitu; salbatu egiten gaitu. /.../
Gabriel Celayaren "Todos a una" poematik itzulita
“Jesus Guridi kontserbatorioaren 25. urteurrena” dokumentalaren estreinaldia
Hainbat hilabetetan lan gogorra egin eta gero, Area Audiovisualekoek prest daukate dagoeneko "Jesus Guridi kontserbatorioaren 25. urteurrena" dokumentala eta gaur, asteartean, maiatzak 15 ikusi ahal izango dugu lehen aldiz Gasteizko Jesu Guridi kontserbatorioan bertan.
Aitor Lz. de Aberásturiren zuzendaritzapean, dokumental honek kontserbatorioari esker sortu diren lau talentudun handienak aztertzen ditu horien zenbait obra interpretatuz Juanjo Mena, BBC Philarmonic-eko zuzendari titularraren batutapean, eta Juanjo Mena berak, Francisco Ibáñezek eta Bingen Mendizabalek egindako gogoeten haritik.
Oraingoz ez dira proiekzio gehiago aurreikusi. Beraz ez galdu alferrik gaurko aukera.
MENDI TOUR ARRASATE 2012
Gaur maiatzaren 15ean asteartea 20:30etan Arrasateko Amaia Udal Antzerkian Gasteizko IV. Mendi Film Festivalean, mendia, abentura eta natura gaiak jorratzen dituen zinemaldian sarituak izan ziren 3 film emango dira MENDI TOURREKO programazioren barruan.
Ikusgai izango diren filmak honakooak dira:
Lehenengoz, Zac Ramras eta Nick Waggoner-ek zuzenduriko “SOLITAIRE” filma izango dugu ikusgai, ikuslegoaren saria lortu zuena.
Solitaire, irudi ezin ederragoz jositako ez-ohiko dokumentala dugu. Maisuki erabilitako argazkia bikainak bazter bihurrienetatik erakusten digu eski eta snowboard-en poesia, argiaren eta ur, elur eta izotzaren ukietan miatuz muturreko paraje babesgabeetan ezinezko itzulipurdiez osatutako dantza baten erdian.
Bigarrenez, Anson Fogelek zuzendutako “COLD” - film laburra proiektatuko da, film labur onenaren saria eskuratu zuena.
Film honen irudien indarrak laburki baina ezinhobeto erakusten ditu Pakistan aldeko zortzimilakoak neguan egitearen zailtasunak.
Saioa amaitzeko, "FLY OR DIE" filma izango dugu ikusgai. Mendiko muturreko kirolen sari onena eskuratu zuen dokumental honek Dean Potter eskalatzaile bikaina du protagonista. Filmak kirolari ameslari eta basati honen filosofia erakusten digu. Muga guztiak hautsi nahian, Dean Potter-ek eskalada librea eta BASE jauzia bateratu ditu heriotzaren hurbiltasunaren sentsazioa zoriontasun bilakatuz hegan egitearakoan.
Aukera polita beraz kalitateko mendiko zinemak eskaintzen duenaz gozatzeko.
Midway, ingurumen-tragedia baten kronika
Midway egitasmoa ingurumen-tragedia hunkigarri eta oso esanguratsu baten bihotzera egindako bidaia baten kronika modukoa da. Sinbolikoki esanguratsua, zeren eta gure planetako uharte isolatuenetako batzuetara garamatzan arren, aldi berean, bizi dugun aroaren metafora gordina baita.
Uhartedia osatzen duten uhartetxoetan, milaka albatroskume hiltzen dira lur gainean egindako habietan, gorputza Ozeano Bareko Zabor Orbana deritzonean igerian dauden plastikozko hondakinez beteta, haien gurasoek ur azaleko zaborra janaritzat hartzen dutelako. Chris Jordan argazkilariaren eskutik edertasuna eta izugarrikeria elkartzen dituen bidaia egin dezakegu, tragedia honen neurriaz eta horretan guk dugun konplizitateaz gogoeta egiteko.
Proiektuaren helburua irudi zirraragarriez haratago doa: hementxe, Ozeano Barearen erdian, gure mundua bere testuinguru osoan ikus dezakegu; benetan gure inpaktua norainokoa den frogatu, eta, padadoxikoki, naturaren edertasuna gozatu, miretsi, eta gure aztarnaren jakitun, aurrera egiteko bidea bilatu.
«Ez nuen nahi lagun koadrila handi bat, kamarak eta guzti, uhartean barrena hara eta hona ibiltzea. Aitzitik, estu-estu konektaturiko artista-talde baten bidaia espirituala eta emozionala egin nahi nuen, Midway inguruak sinbolizatzen duena adierazteko. Gai izango ahal gara gaur egun gizadia aurkitzen den une mugarri honen lekukotasun sentibera emango duen multimedia lan artistiko bat egiteko? Eta, ekaitzaren begian –Itsas Zurrunbiloaren erdigunean–, agian, gure ahaleginak lagunduko du zauri hau sendatu dezakeen erabaki kolektiboak hartzen.»
(Chris Jordan argazkilari eta artista)
Midway ez da soilik arriskuan dagoen basabizitzari buruzko dokumental bat. Aukera bat ematen digu mundua lehen-lehen plano batetik ikusteko, gure bizialdiak planetan zer nolako inpaktua duen jakiteko, eta aurrera egiteko bide berriak aurkitzeko.
YouTubeko gunearen bidez eta han-hemenkako sare sozialen bidez, hainbat bideo labur eta istorio eskuragarri jarriko dira aurrerantzean ere. Midway Journey taldearen asmoa da egitasmoaren berri zabaltzen jarraitzea, eta horrek esan nahi du audientzia gero eta handiagoa izatea. Tarteka-tarteka, istorioak, irudiak, bideoak… jarriko dira edonoren eskura.
Basartena film laburren lehiaketaren V. ediziorako deialdia
Basartena 2012 film laburren lehiaketa jarri dute martxan berriz Urdulizen. Ekimena Basartena Tabernako Patxi Lazkanok gidatzen du, izan ere, Lazkanok ibilbide luzea egin du iraupen laburreko filmen esparruan.
Lehiaketan parte hartzeko epea maiatzaren 31n amaituko da. Aurtengoa V. edizioa izango da eta iazko formatuari jarraituko zaio.
Kostu handiko ikus-entzunezko lan hauek sustatu eta laguntzekoa plataforma eratzea izan da ekimenaren xede nagusia.
Lehiaketan adin guztietako zinemagileek parte har dezakete, DVD formatuan eta gehienez bi lan aurkeztu ahal izango dute, euskaraz zein gaztelaniaz. Lanok ezin izango dute 25 minutuko iraupena gainditu. Arazo teknikoak direla eta proiektatuko ezin izango diren lanak ez dira onartuko.
Dozena bat finalista aukeratuko dira eta uztailaren 28an erakutsiko dira Urdulizeko Kultur Etxean eta Bilboko Abokatuen Elkargoan; inguruko jendeak ere aukera izango du filmak ikusteko Plentzia Telebista tokiko telebistan.
Epaimahaiak amaierako saioan, uztailaren 28an, emango du bere epaia.
Sariei dagokionez, orotara lau izango dira: Fikziozko lan onena, 600 euro eta ikurra; Animaziozko lan onena, 600 euro eta ikurra; Euskal Herriko Zine Eskoletako lan onena, 300 euro eta ikurra; eta, azkenik, Euskaraz eginiko lan onena, 300 euro eta ikurra.
Lehiaketan parte hartzeko xehetasun guztiak Basartena 2011 ekimenaren webgunean biltzen dira.
Las Jotas, Marjane Satrapiren azken filma prest dago
Vincent Paronnaud-en laguntzaz zuzendutako Persepolis filmaren [trailerra, film focus] (Epaimahiaren saria Canneseko 2008ko edizioan) eta Poulet aux prunes [trailerra] filmaren ostean (iaz Venezian lehian ibilitakoa) Marjane Satrapi komikigilea eta zinegile iraniarra bakarrean ari da zuzentzen bere hirugarren film luzea, post-produkzio fasean dagoena. Las Jotas izena duen film hori maiatzaren 16 eta 27 bitartean Canneseko zinemaldiaren 65. edizioko Marché du Film deritzan azokan ikusi ahal izango da lehen aldiz.
Marjane Satrapi Las Jotas filmaren gidoiaren egilea izateaz gain filmaren protagonista ere bada. Berarekin batera Mattias Ripa, Stéphane Roche, Ali Mafakhreri, Cristian Pirjol eta Maria de Medeiros ditu antzezkide.
Filma road movie horietako bat dugu eta "new age psikomesianiko"tzat jo izan dute. Nolabait, 50 eta 60 hamarkadetako Z serieko zine amerikarra omentzen du eta komedia eta sasipoliziazko generoen mugartean dabil. Zuzendariaren beraren, bere senarra den Mattias Ripa suediarraren eta François-Xavier Decraene-ren jabetzakoa den Taj Films-en ekoizpen hau lagunarteko giro eroan filmatu omen dela esaten digute.
Jakinminez jota gaude emakume interesgarri honen azken lan honek zer ekarriko digun. Beraz berri gehiagoren zain geratzen gara.
Iturria: cineuropa.org
Zine-blogerren maratoia
Maiatzaren 4tik 13a arte gazteleraz idazten diren zine-blogerren lehen maratoia egingo da Film Focus-en, bertan mundu osoko bitakorek parte hartu ahal izango dutela. Beraz, espainolezko zine-bloga baduzu eta zure iruzkinak, kritika edo artikuluak besteekin konpartitu nahi badituzu aukera paregabea duzu bilera birtual honetan parte hartuz.
Euskaraz idazten dugunok antzeko zeozer asmatu beharko dugu elkar ezagutzeko eta esperientziak konpartitzeko.
Edonola ere, ekimen hau zehatz-mehatz zertaz doan jakin nahi baduzu jarraiozu esteka honi.
2012ko Zine Blogerren Maratoiaren aurkezpena
Parte hartzekoak diren blog en aurkezpena
Izena emateko emaila: maratonbloggers2012@hotmail.com
“Animabasauri bereziak: zineko ostegunak”
Maiatzaren 26 eta 31 bitartean garatzekoa den Animabasauri-Animabasque 8. Animaziozko Zinemaldiaren atari gisa, Basauriko Sozial Antzokian animaziozko filmak jatorrizko bertsioan ikusteko aukera izango dugu maiatzeko ostegunetan “Animabasauri bereziak: zineko ostegunak" izenburupean.
Egia esan, programazioa osatzeko aukeratutako lau filmak estilo ezberdinekoak baina apartak dira oso, alegia, Ari Folmanen Waltz with Bashir, Fernando Truebaren Chico y Rita, Sylvain Chometen L'illusionniste eta Marjane Satrapiren Persepolis.
Film bakoitza bi aldiz emango da, 20:00etan eta 22:00etan, baina bietan ere espainolezko azpitituluekin.
Eta hortaz galdera: bi emanaldi izanik zergatik ez eman horietako bat behintzat euskarazko azpitituluekin?
Iturria: http://www.animabasauri.com/es/?p=1477
Programazioa: http://www.bartonfilms.com/images/stories/jueves_de_cine.pdf
San Prudentzio Everesten egon zenekoa
Alberto Zerain San Prudentzioaren irudiarekin Everesteko gailurrean 1993ko maiatzaren 16an
Pasa den abenduan burututako Nazioarteko 4. Mendi Zinemaldiaren barruan, KREAk eta Mendi Film Festival-ek mendiko bideo-produkzio tailerra antolatu zuten, Jordi Canyigueral eta Pau Savall-en gidaritzapean. Tailerrak mendiko eta eskaladako bideoak egiteko oinarrizko eta aurreratutako ezagutzak eta gakoak eskaintzea zituen helburu eta, bertan, mendi eta eskaladako bideoen grabazio- eta postprodukzio-tekniken ikaskuntza eta hobekuntza jorratu zen profesional mailan.
Egia esateko, tailerrak harrera ezinhobea izan zuen eta, tamalez, hainbat interesdun tailerretik kanpo geratu ziren. Zorionez antolakuntzak agindu duenez antzeko tailer gehiago egiteko asmoa dago urtean zehar ahalik eta jende gehienari aukera emateko.
Oraingoan, arabarrok San Prudentzio jaiak ospatzekotan gaudela aitzakitzat hartuz tailerrean zehar burututako lanetako bat dakarkizuet. Izan ere bideo horretan Alberto Zerain mendizala arabarrak aspaldiko anekdota bat ekartzen digu gogora, alegia, nola eraman zuen San Prudentzioren irudia Everesteko gailurrera lehen espedizio arabarrak (93-05-16).
Tira ba, erlijio kontuak alde batera utziz horra hor anekdota tailerreko ikasleek gauzatutako bideo txukun honetan. Por zierto, ikusi nahi duenarentzat Oroko santutegian dago arabarron patroiaren iruditxo hori.
Hizkuntzak/Idiomas
Albisteak
Nomadak zinekluba
Atalak
Azken sarrerak
- “Ensayo de una revolución”
- “Jesus Guridi kontserbatorioaren 25. urteurrena” dokumentalaren estreinaldia
- MENDI TOUR ARRASATE 2012
- Martintxo zine-kritikariaren istorioak, 2012-5-9
- Midway, ingurumen-tragedia baten kronika
Artxiboak
Esteka interesgarriak
- 39 escalones
- Cahiers du cinema
- Cine con jazz
- Contrapicado
- Notas de cine
- Otro cine
- Otros clásicos
- Pasión silente
- perroferozamarillo
- Un mundo desde el abismo
Euskarazko orriak
- Azpitituluak euskeraz
- Filmazpit
- HausnaUrtu
- Iruditxokoa
- Kulturklik
- Tinko euskara elkartea
- Wilderrek egingo lukeen bezala
Zine-banatzaileak
Zineklubak
- b-cramps
- Bergarako Gaztetxeko Zinekluba
- Cine forum Herrikoi
- Cineclub FAS
- Goieniz zinekluba
- Okendo zinema-taldea
- Zine Klub Butak 21
- Zineklub Gernika
